Súıikti isim kásibime aınaldy – aǵashtan túrli buıym jasaıtyn qolónershi

- Boıyńyzdaǵy qolónerge degen qabiletti eń alǵash qashan baıqadyńyz?

- 1977 jyly Aqsýat aýdanynda dúnıege keldim. Jantikeı aýylyndaǵy orta mektepte bilim aldyq. Mektep qabyrǵasynda júrgende eńbekke baýlý sabaǵyn jaqsy kóretinmin. Aǵashty kesip, ár túrli zat jasaý qyzyq bolatyn. 2005 jyly Katonqaraǵaı aýdanyna kóship keldim. Sol ýaqyttan bastap kúni búginge deıin aýdan ortalyǵynda turyp kelemin.

Alǵashynda qolóner tek áýestigim edi. «Báıterek» monýmentin jasap, dostaryma, týǵan-týys pen tanystarǵa syılyq retinde berip júretinmin. Bir jerge qonaqqa barǵanda, týǵan kúnde ne syılaımyn dep bas qatyrmaısyń. Óz qolyńmen jasaǵan dúnıe bolǵan soń erekshe baǵalanady ǵoı. Al súıikti isim kásibime aınalady dep oılamappyn.

- Qashannan bastap qolónerge túbegeıli den qoıdyńyz?

- 2013 jyldan beri. Áýelde túrli kádesyı jasap sata bastadym. Jylqy, maral beınelenip, «Katonqaraǵaı», «Berel» dep jazylǵan kádesyılar týrısterge jaqsy satyldy. Jylqy – tórt túliktiń tóresi, qazaq halqynyń kóneden pir tutqan kıeli janýary ǵoı. Al maral bul Katonqaraǵaıdyń brendi ispettes. Munda kelgen jandar pantymen emdelgendi qup kóredi. Ekinshi Shveıtsarııa atanyp ketken osynaý ólkege taban tireıtin týrısterdiń birinshi suraıtyny osy – panty.

Ýaqyt óte kele jasaıtyn buıymdarymyz da kóbeıdi. Astaý, tostaǵan jasaýǵa kóshtik. Sandyq, tósek, ústel, oryndyq, maraldyń beınesi qashalyp salynǵan shkaf, ár túrli jazýy bar stend te bizdiń qolymyzdan shyǵyp jatyr. Ár ónimniń dızaınyn ereksheleýge tyrysamyn. Baǵalary da qoljetimdi. Buıymdardy kóbinese balqaraǵaıdan jasaımyn.

- Ónimderińizdi qalaı saýdalaısyz?

- Katonqaraǵaı aýylynda úıimniń týra qasynda ashqan kishigirim dúkenim bar. 2020 jyly sheberhanam da ashyldy. Aýyldyq aımaqtardy turaqty damytý qory arqyly byltyr kúzde kásibimdi damytýǵa 2 mln teńge aldym. Qazir isim oıdaǵydaı órbip keledi deýge bolady. Alaıda sheberhanam tarlyq etýde. Onyń jalpy aýdany – 40 sharshy metr. Іshte jumys istegen kezde tek eki adam syıamyz. Tapsyrys kóbeıip ketkende qıyndaý.

Sodan keıin áleýmettik jeli arqyly saýdalaımyn. Instagram jelisinde paraqsha ashyp, taýarlarymnyń sýretterin jarııa etip turamyn. Berel qorǵandaryna baratyn týrıster de meniń kádesyılarymdy satyp ala alady.

- Oqýshylardy qolónerge baýlyp, shákirt tárbıelep jatqanyńyzdy estidik. Sol jaıly aıtyp ótseńiz...

- Tek oqýshylar ǵana emes, úırengisi kelgen kez kelgen adamǵa esigim ashyq. Búginde 8 adamǵa úıretip jatyrmyn. Esh aqysyz. Olardyń arasynda eresekter de bar. Jańa aıtqanymdaı, sheberhanamnyń tarlyǵy qolbaılaý bolyp tur. Sonyń saldarynan kelgenderdiń barlyǵy ishke syımaıdy. Ýaqyttaryn kelisip, jeke-jeke úıretýge týra keledi. Shúkir, qolynan is keletin, aǵashtan buıym jasaýǵa ıkemi bar balalar men jigitterdiń qyzyǵýshylyǵy zor. Tapsyrys kóbeıgende olardy jumysqa da tartamyn. Al jumys istep, turaqty eńbekaqy alatyn tek bir qyzmetkerim bar.

Taıaýda Katonqaraǵaıda halyqaralyq aıtys boldy. Sol kezde barlyq bezendirý jumystary bizdiń moınymyzǵa tústi. Bul úlken jaýapkershilik qoı. Abyroımen alyp shyqqan sekildimiz. Shynyn aıtqanda, qur kádesyı jasaýdan az aqsha túsedi. Sondyqtan osyndaı sharýalardy da qolǵa alyp júrmiz.

- Aldaǵy josparlaryńyz qandaı?

- Aldaǵy qyrkúıek aıynda sheberhanamdy úlkeıtýdi kózdep otyrmyn. Ol úshin shamamen 3-4 mln teńge kerek. Aýmaǵy 180 sharshy metrdeı bolsa deımin. Sodan keıin ónimderime degen suranysty kóbeıtkim keledi. Jalpy aıta berseń jospar kóp qoı. Biraq bárin jarııa ete bermeı, elge nátıjesin kórsetkendi jón sanaımyn.

- Kez kelgen adam qolónershi bola ala ma, álde ol úshin týabitti qabilet kerek pe?

- Mysaly, hırýrg bolý úshin adam talaı jyl bilim alady, jumys istep tájirıbe jınaqtaıdy. Al synyqshy bolsa eshqandaı dıplomsyz-aq súıekti ornyna salyp beredi. Bul da týra sol sekildi. Keıbireýler mańdaı terin tógip, kúndiz-túni eńbektenip qolónerge ıkemdense, endi biri týabitti qabiletimen op-ońaı ilip áketedi. Ondaı adamǵa baǵyt berip, jol nusqasań boldy. Ár aıtqanyńdy qaǵyp alyp, bilek sybana iske kirisedi.

- Áńgimeńizge kóp rahmet!