«Sáıgúlik»: Tabyldy Dosymovqa arnalǵan qoıylym qalyń kórermenge jol tartady
ASTANA. KAZINFORM – Jaqynda ómiri men óneri ańyzǵa aınalǵan qazaqtyń tuńǵysh bard aqyny Tabyldy Dosymov týraly qoıylym kórermenge jol tartpaq. Spektakldiń avtory men aktery Jibek Joly arnasynyń «Búgin LIVE» stýdııasyna qonaq bolyp, jańa týyndyny qalyń kórermenge tanystyrdy.
– Bıyl Tabyldy Dosymovtyń 60 jyldyǵy ǵoı. Sol týraly bile sala Atyraýǵa qaraı jol tarttyq. Qaladaǵy Mahambet teatrynda da Tabyldy jaıly spektakl qoıyldy. Biz bul tulǵany zerttegen kezde basqa da qoıylymdardyń qalaı qoıylyp jatqanyn kórý úshin ondaǵy spektakldi de qarap shyqtyq. Ary qaraı aqynnyń týǵan jeri Inder aýdanyna saparladyq. Aǵamyzdyń basyna baryp, quran baǵyshtap, uly Abylmen jolyǵyp, balalarynan ruqsatyn aldyq. Ol jaqta ánshiniń dostary basqaratyn Tabyldy atyndaǵy úlken qor bar. Solardyń bárimen kelisip, óz ıdeıamyzdy aıttyq. Ol kisilerde biz bilmeıtin kitaptar, biz bilmeıtin án dıskileri bar eken. Buryn ózi jumys istegen mádenıet úıine de jol tústi. Kózi tirisinde kórgen adamdarmen suhbattastyq. Sol materıaldardyń bárin jınaǵannan keıin, Astanaǵa kelip, jazýdy bastap kettim, - deıdi «Sáıgúlik» mýzykalyq dramasynyń avtory Qazybek Amanjol.
Qoıylymnyń premerasy 12-13 shilde kúnderi Ázirbaıjan Mámbetov atyndaǵy memlekettik drama jáne komedııa teatrynda ótedi.
– Ony naýryz aıynda jazyp bitirdim. Keıin rejısser ekeýmiz birge qarap shyqtyq. Solaı mamyr aıynan bastap qoıylymnyń oqylymyna kiristik. Keıin Tabyldynyń uly Abyldyń ózi kelip, stsenarııdi oqydy. Pesa oǵan qatty unady. Shyǵarma jazylmaı turyp aıtqan óziniń oılary da bolatyn. Sonymen sanasyp, keıipkerimizdiń barlyq jaqynymen kelisip, kórkemdik qoıylym daıyndap shyǵardyq. Qazir osy tusaýkeserge daıyndalyp jatyrmyz. Mýzykalyq drama tek Tabyldynyń ánderimen qoıylady. Qoıylym 1 saǵat 40 mınýtqa sozylady. Spektaklde biz kóbine onyń stýdenttik, jastyq shaǵyn sahnalaımyz. Óleńderi qalaı, qaı ýaqytta shyqty? Tabyldy aǵamyz Jeltoqsan kóterilisine de qatysqan jáne Almatydaǵy basynan keshken oqıǵalary qamtylady, - deıdi qoıylym avtory Qazybek Amanjol.
Al Tabyldynyń rólin somdaıtyn akter ózin bard aqynǵa uqsatatyndar jıi kezdesetinin aıtady.
– Bizde basqa da qoıylymdar bar. Sol qoıylymdardyń birin qoıyp júrgen kezde rejısser Álı Bıdahmet «Seniń osy Tabyldy Dosymovqa túr-sıpatyń, kelbet-keskiniń keledi» dep aıtqan edi. Bir kúni ony da qoıarmyz dep júrip, búginde daıyndyqty bastap kettik. Jalpy, eldiń bári maǵan «uqsaısyń» dep jıi aıtady. Múmkin, uqsaıtyn da shyǵarmyn. Qoıylymda bas-aıaǵy 13 án oryndalady. Olardyń 6-aýy meniki, - deıdi Aqjol Amantaı.
Aıta keteıik, Almaty ákimdigi Muhtar Áýezov atyndaǵy Qazaq ulttyq akademııalyq drama teatryn jóndeý jumystary 2026 jylǵa deıin aıaqtalatynyn jetkizdi.