Súıektiń qaterli isigine kóbine 10 jastan asqan balalar shaldyǵady — onkolog
ALMATY. KAZINFORM — Elde jylyna orta eseppen 25 baladan osteosarkoma — súıektiń sırek kezdesetin qaterli isigi anyqtalady.
Pedıatrııa jáne balalar hırýrgııasy ǵylymı ortalyǵynyń joǵary sanatty dáriger onkologi, onkoortoped Bahram Jumadýllaevtyń aıtýynsha, osteosarkoma — súıektiń sırek kezdesetin qaterli isigi. Dert kóbine 10 jastan asqan balalarda jıi kezdesedi.
— Ǵylymı ortalyqta balalardaǵy osteosarkomalar kezinde iri býyndardy endoprotezdeý boıynsha biregeı kúrdeli operatsııalar 2012 jyldan beri jasalady. 13 jylda 100-den astam jasópirimge mega-endoprotezdeý operatsııasy júrgizildi. Bul otalar balalardyń aıaq-qolyn saqtaýǵa ǵana múmkindik bermeı, tolyqqandy ómir súrýge yqpal etti. Budan bólek, súıek isigi kezinde joǵary mólsherli hımıoterapııany engizý arqasynda basqa organdarǵa metastazdanýdyń tómendeýi jáne ómirsheńdik artty. Emdeýdiń osy túri osteosarkomaǵa shaldyqqan balalardyń 90 paıyzyna qoldanylady, — deıdi № 2 hırýrgıı bóliminiń meńgerýshisi Bahram Jumadýllaev.
Onkolog elde jylyna orta eseppen 20-25 baladan osteosarkoma — súıektiń sırek kezdesetin qaterli isigi anyqtalatynyn atap óti. Barlyq osteosarkomanyń 50 paıyzy tize býynyna, 30 paıyzy ıyq-býynyna jaqyn ornalasady.
— Aıaq-qoldy saqtaı otyryp emdeý aıaqtalǵannan keıin jalpy saýyǵyp ketý jaǵdaılary elimizde 71 paıyz. Bul nátıje osteosarkomany zertteý jónindegi halyqaralyq mýltıortalyqtar nátıjesiniń derekterimen saı keledi. Onkologııa salasyndaǵy eń kúrdeli operatsııa tegin medıtsınalyq kómektiń kepildendirilgen kólemi negizinde tegin jasalady. Biregeı operatsııalardyń nátıjesinde balalardyń ómir súrý sapasy jaqsarady. Búgingi kúni olar ózderiniń qurby-qurdastarymen qatar deńgeıde mektepke baryp, ýnıversıtette oqyp, túrli qyzmette jumys isteıdi. Tipti turmys quryp 2-3 balanyń ata — anasy atanyp jatqandar bar, — dedi ol.
Osyǵan deıin Taldyqorǵanda alǵash ret qaterli isikke kúrdeli ota jasalǵany týraly jazǵan edik.