Sý únemdeý tehnologııalaryna 214 mlrd teńgeden astam qarjy bólinedi
ASTANA. KAZINFORM — Qazaqstanda fermerlerdi sý únemdeý tehnologııalaryna kóshirý úshin memlekettik qoldaý kúsheıtilip jatyr.
Aldaǵy úsh jylda bul baǵytqa 214,6 mlrd teńge ınvestıtsııalyq sýbsıdııa qarastyrylyp, otandyq sýarý jabdyqtaryn óndirý de qarqyn alyp otyr. Bul týraly Sý resýrstary jáne ırrıgatsııa vıtse-mınıstri Talǵat Momyshev aıtyp berdi.
Onyń aıtýynsha, fermerlerdiń sý únemdeıtin tehnologııalarǵa qoljetimdiligin arttyrý maqsatynda elimizde birqatar óndiris oryndary jumys istep tur.
— Sondaı-aq, 2026-2028 jyldarǵa arnalǵan jalpy sıpattaǵy transfertter aıasynda sý únemdeý tehnologııalaryn engizýge baǵyttalǵan ınvestıtsııalyq shyǵyndardy sýbsıdııalaýǵa 214,6 mlrd teńge bólý josparlanǵan. Onyń ishinde jyldar boıynsha 58,5 mlrd, 74,6 mlrd jáne 81,5 mlrd teńge qarastyrylǵan. Bul kórsetkish aldyńǵy úsh jylmen salystyrǵanda tórt ese joǵary, — dedi T. Momyshev Ortalyq kommýnıkatsııalar qyzmetinde ótken baspasóz máslıhatynda.
Budan bólek, aýyl sharýashylyǵy taýaryn óndirýshilerge sý jetkizý qyzmetteriniń qunyn sýbsıdııalaýǵa 13,5 mlrd teńge qarastyrylǵan.
— Jergilikti atqarýshy organdar da bul baǵyttaǵy jumysty kúsheıtip, ınvestıtsııalyq sýbsıdııalardy qarjylandyrý úshin arnaıy bıýdjettik baǵdarlamalar ashty. Jalpy, sý resýrstaryn tıimdi paıdalaný máselesi Úkimettiń turaqty baqylaýynda. Ásirese sý tapshylyǵy qaýpi joǵary ońtústik óńirlerde — Jetisý, Túrkistan, Qyzylorda, Jambyl jáne Almaty oblystarynda kóshpeli keńester ótkizildi. Mamandardyń aıtýynsha, sý únemdeý tehnologııalaryna der kezinde kóshý agrarlyq salanyń turaqtylyǵyn qamtamasyz etip, eldegi sý resýrstaryn saqtaýda sheshýshi ról atqarady, — dedi Talǵat Momyshev.
Aıta keteıik, elimizde sý resýrstaryn tıimdi paıdalaný baǵytyndaǵy jumystar kúsheıip keledi. Sý únemdeý tehnologııalary engizilgen egis alqaptarynyń kólemi birneshe ese ósip, 2025 jyly 543 myń gektardan asqan. Bılik 2030 jylǵa qaraı bul kórsetkishti 1,3 mln gektarǵa jetkizýdi kózdep otyr.
