Sý únemdegen sharýalarǵa sýbsıdııa 80% deıin artady
ASTANA. KAZINFORM — Elimizde sý resýrstaryn tıimdi paıdalaný baǵytyndaǵy jumystar kúsheıip keledi. Sý únemdeý tehnologııalary engizilgen egis alqaptarynyń kólemi birneshe ese ósip, 2025 jyly 543 myń gektardan asqan. Bılik 2030 jylǵa qaraı bul kórsetkishti 1,3 mln gektarǵa jetkizýdi kózdep otyr. Bul týraly Sý resýrstary jáne ırrıgatsııa vıtse-mınıstri Talǵat Momyshev aıtyp berdi.
Onyń aıtýynsha, sý resýrstaryn utymdy paıdalaný jáne sý únemdeý tehnologııalaryn keńinen engizý ekonomıkanyń barlyq salalary úshin erekshe mańyzdy bolyp otyr. Sý paıdalaný tıimdiligin arttyrý basymdyq qana emes, turaqty damýdyń qajetti shartyna aınalýda.
— Salanyń negizgi qujaty — sý resýrstaryn tıimdi paıdalanýdy arttyrýǵa baǵyttalǵan sharalardy kózdeıtin jańa Sý kodeksi. Sý resýrstaryn basqarý júıesin damytýdyń 2030 jylǵa deıingi tujyrymdamasynda da salanyń uzaq merzimdi damýy kórinis tapqan. Oǵan qosa, sý salasyn damytýdyń 2028 jylǵa deıingi keshendi jospary, 2026 jylǵa deıingi sý únemdeý jónindegi jol kartasy ázirlengen, — dedi T. Momyshev Ortalyq kommýnıkatsııalar qyzmetinde ótken baspasóz máslıhatynda.
Ásirese sýarmaly eginshilikte zamanaýı sý únemdeý tehnologııalaryn engizýge erekshe kóńil bólinýde. Bul baǵytta Prezıdent sý únemdeý tehnologııalaryn qoldanatyn sýarmaly alqaptardy jyl saıyn 150 myń gektarǵa deıin ulǵaıtý jóninde tapsyrma bergen.
Qazirgi ýaqytta aýyl sharýashylyǵy sýdyń eń iri tutynýshysy bolyp qala beredi. Jalpy sý tutynýdyń shamamen 65% osy salaǵa tıesili. Sý únemdeý tehnologııalaryn keshendi engizý maqsatynda Sý mınıstrligine aýyl sharýashylyǵy taýaryn óndirýshilerge sýarmaly sý qyzmetteriniń qunyn sýbsıdııalaý, sondaı-aq sý únemdeý tehnologııalaryn engizýge jumsalatyn shyǵyndardyń bir bóligin óteý fýnktsııalary berilgen.
— 2024 jyldan bastap aýyl sharýashylyǵy taýaryn óndirýshilerdi sý únemdeý tehnologııalaryna kóshýge yntalandyrýdyń negizi qalandy. Atap aıtqanda, ınfraqurylymdy júrgizý kezinde uńǵymalardy burǵylaýǵa, sý únemdeý tehnologııalaryn satyp alýǵa jáne ornatýǵa jumsalǵan fermerlerdiń shyǵyndaryn óteý úlesi 50%-dan 80%-ǵa deıin ulǵaıtyldy, — dep tolyqtyrdy spıker.
Sonymen birge, tarıf qunyna baılanysty sýbsıdııalardyń saralanǵan mólsheri engizildi. Sý únemdeý tehnologııalaryn qoldanǵan jaǵdaıda sýbsıdııa mólsheri 60%-dan 85%-ǵa deıin ulǵaıady. Al qoldanylmasa — jyl saıyn 10%-ǵa tómendeıdi.
— Qabyldanǵan sharalar naqty nátıje berip otyr. Buryn jyl saıyn qamtý kólemi 30-35 myń gektar bolsa, 2024-2025 jyldary bul kórsetkish jylyna shamamen 150 myń gektarǵa jetti. 2025 jyly sý únemdeý tehnologııalary qoldanylǵan alqaptar 543,5 myń gektardy qurap, nátıjesinde 874 mln m³ sýarý sýyn únemdeýge múmkindik berdi, — dedi Sý resýrstary jáne ırrıgatsııa vıtse-mınıstri.
2030 jyldyń sońyna qaraı bul kórsetkishti 1,3 mln gektarǵa deıin jetkizý josparlanyp otyr, bul 2,2 mlrd m³ sýarý sýyn nemese shamamen 30% deıin únemdeýge múmkindik beredi.
Buǵan deıin Aýyl sharýashylyǵy mınıstrligi sý kóp qajet etetin daqyldar alqaby qalaı qysqartylǵanyn aıtqan edi.