Sýtekti energetıkany damytý tujyrymdamasy shıki daıyndalǵan – Edil Jańbyrshın

ASTANA. KAZINFORM – Májilis depýtaty Edil Jańbyrshın sýtekti energetıkany damytý tujyrymdamasyn synǵa aldy.

- Energetıka mınıstrligi 2030 jylǵa deıingi sýtekti energetıkany damytý tujyrymdamasyn ázirledi. Birinshiden, tujyrymdama shıki daıyndalǵan, ındıkatorlaryn oryndaý múmkin emes. Sebebi 2026 jyly keıbir jobalardy pılottyq rejımde bastaý josparlanǵan, biraq, ekonomıka, óndiris ne mınıstrlik daıyn emes. Sýtegini óndirý jańa tehnologııany qajet etedi, ol bizde shyqpaıdy. Ekinshiden, jasyl sýtegi bolǵandyqtan jasyl energııany qoldanýymyz kerek. Úshinshiden, biz óndirgenniń ózinde ony qaıda paıdalanamyz? Kim tutynady? Kólik desek, sýtegimen júretin kólik joq, al óndiriste qoldanamyz desek, arnaıy ınfraqurylym joq. Sebebi sýtegi óte qaýipti gaz, - dedi Edil Jańbyrshın Májiliste ótken dóńgelek ústelde.

Májilis depýtatynyń málimdeýinshe, ázirge sýtekti energetıkany damytý qaǵaz, joba júzinde qalyp otyr.

- Ǵylymı zertteý jumystary júrip jatyr, biraq ol pılottyq rejımde. Qýaty, kólemi tómen, aýqymdy jobalar áli iske asqan joq. Mańǵystaý oblysynda Hyrasia One kompanııasy jobany qolǵa aldy. Biraq, kóptegen másele bar, onyń ishinde ekologııa, eksport, logıstıka taǵy sol sııaqty sheshilmegen suraqtar bar. Bizdiń paıymdaýymyzsha, birinshiden, memlekette bir saıasat, birizdilik bolý kerek. Bunymen Ónerkásip jáne qurylys mınıstrligi aınalysýy qajet dep sanaımyz. Ekinshiden, ǵylymı zertteý jumystaryn damytqan jón. Úshinshiden, maman daıarlaýdy qolǵa alýymyz kerek, ol úshin standart, oqý baǵdarlamasyn ázirleý tıis, - dep tolyqtyrdy halyq qalaýlysy.

Búgin Májilistiń Ekologııa máseleleri jáne tabıǵatty paıdalaný komıtetinde «Qazaqstan Respýblıkasynyń sýtegi energetıkasyn damytý perspektıvalary» taqyrybynda dóńgelek ústel ótti.

Eske salaıyq, byltyr elimizde sýtegi energetıkasyn damytýdyń 2030 jylǵa deıingi tujyrymdamasy bekitildi.