Sý tasqynynan saqtandyrý: Bankter men qarjy ınstıtýttary buǵan múddeli emes

ASTANA. KAZINFORM — Tótenshe jaǵdaılar mınıstri Shyńǵys Árinov tabıǵı apattardan azamattardyń múlkin saqtandyrý modelin ázirleý tapsyrmasy qalaı iske asyp jatqanyn túsindirdi.

Byltyr Prezıdent Qasym-Jomart Toqaev azamattardyń múlkin saqtandyrý júıesin odan ári jetildirý joldaryn qarastyrýdy tapsyrǵan edi. 

Búgin Senattaǵy kóktemgi sý tasqynyna daıyndyq máseleleri boıynsha Úkimet saǵatynda depýtat Bekbol Orynbasarov azamattardyń múlkin saqtandyrý modelin ázirleý jóninde suraq qoıdy.

— Munda kompanııalar tabıǵı apattardan kelgen zalaldy qalpyna keltirýge jumsalatyn shyǵyndardyń edáýir bóligin óz moınyna alady. Bul máseleni memlekettik organdarmen jáne jergilikti atqarýshy organdarmen qarastyryp jatyrsyzdar ma? Qandaı jumystar júrgizilýde? Jol kartasy ázirlendi me? Bul máseleni keıinge qaldyrýǵa bolmaıdy, — dedi senator.

Óz jaýabynda Qarjy vıtse-mınıstri Abzal Beısenbekuly múlikti saqtandyrý máselesi, sonyń ishinde sý tasqyny saldarynan zardap shekken múlikti saqtandyrý Qarjy mınıstrliginiń quzyretine kirmeıtinin aıtty. Bul másele Ulttyq banktiń quzyretine jatady.

Ol Tótenshe jaǵdaılar mınıstri Shyńǵys Árinov vıtse-premer Qanat Bozymbaevtyń qatysýymen saqtandyrý máselesi talqylanǵanyn, oǵan túrli mamandar, tipti Qarjy naryǵyn retteý agenttiginiń basshylyǵy da shaqyrylǵanyn jetkizdi.

— Tıisti tapsyrma berilip, jumys toby quryldy. Qazirgi ýaqytta saqtandyrý modelin tańdaý jáne álemdik tájirıbeni zertteý jumystary júrgizilýde. Sebebi kóptegen iri bankter men qarjy ınstıtýttary bul baǵdarlamaǵa qarajat bólýge asa múddeli emes sııaqty. Osyǵan baılanysty qıyndyqtar bar. Qazir Dúnıejúzilik bank pen Azııa damý bankimen jumys júrgizilýde, — dedi TJ mınıstri.

Buǵan deıin Senat tóraǵasynyń orynbasary Jaqyp Asanov jyl saıyn tasqynnyń sebebimen emes, tek saldarymen kúrese bersek, eshqandaı bıýdjettiń aqshasy jetpeıtinin aıtqan edi.

Qazirgi ýaqytta elimizde sý basý qaýpi bar aımaqtarda 1 223 eldi meken bar.