Sý tasqynynan keıin 16 myń qazaqstandyq otbasy memleketten kómek aldy

ASTANA. KAZINFORM — Qazaqstanda joıqyn sý tasqynynan zardap shekken azamattarǵa keltirilgen zalaldy óteý jalǵasyp jatyr. Úkimet atalǵan jumysty Memleket basshysy Qasym-Jomart Toqaevtyń tapsyrmasy boıynsha júzege asyryp jatyr. 

Respýblıkanyń zardap shekken aımaqtarynyń turǵyndary arnaıy qurylǵan óńirlik komıssııalarǵa tıisti ótinishin berip jatyr. 

Búgingi tańda 24 835 ótinim qabyldandy.

Bıylǵy 4 mamyrdaǵy jaǵdaı boıynsha 16 168 otbasy 5,7 mlrd teńgeden astam somaǵa 100 AEK mólsherinde birjolǵy tólem aldy.

Mal basynyń shyǵyny úshin beriletin tólem kólemi 916 mln teńgeden asty.

Búgingi tańda zardap shekken óńirlerde 4 556 turǵyn úı tekserilip, 2 845 nysanda baǵalaý jumystary júrgizildi.

Jóndeý jumystaryn júrgizýge jáne turǵyn úıdi qalpyna keltirýge 696 mln teńgeden astam qarajat bólindi.

Atalǵan kómek 530 otbasyn qamtydy.

Aqmola, Qostanaı, Qaraǵandy jáne Pavlodar oblystarynda taǵy 53 otbasyǵa qıraǵan baspanalarynyń ornyna úıler men páterler berildi.

Zalaldy óteý jumystary jalǵasýda jáne Úkimettiń qatań baqylaýyna alynǵan.

El Prezıdentiniń tapsyrmasy boıynsha barlyq zardap shekken azamattarǵa jan-jaqty kómek pen qoldaý kórsetiledi.