Sý tasqyny: SQO-da Teplıchnoe eldi mekeni mańynda myńnan asa adam túni boıy jumys istedi
PETROPAVL. KAZINFORM — Soltústik Qazaqstan oblysyndaǵy Teplıchnoe eldi mekenin tasyǵan ózen sýynan qorǵaý úshin bóget nyǵaıtylyp jatyr.
Áleýmettik jelide Teplıchnoe eldi mekenindegi bóget tasyǵan Esil sýyna shydas bermeı jaryldy degen habar tarady. Bul jalǵan bolyp shyqty.
Qoǵam belsendisi, Petropavl qalalyq máslıhatynyń depýtaty Zákirjan Mamlıýtovtyń aıtýynsha, bógettiń keı jerinde sýdyń jetýine 25-40 sm qaldy. Sondyqtan myńnan astam adam keshe keshke qaraı jumysqa kirisip, nyǵaıtyp jatyr.
— Bul jerde tótenshe jaǵdaılar departamentiniń, Ulttyq ulany akademııasynyń, túrli memlekettik mekemelerdiń, kompanııalardyń ókilderi, volonterler men turǵyndar uzyn tizbek jasap jumys istep jatyr. Tómen jerlerge qum salynǵan qaptardy qoıyp, ústin plenkamen jabady, — deıdi Zákirjan Mamlıýtov.
Osylaısha, eldi mekenge tóngen qaýiptiń aldy alyndy.
— Sergeev sý qoımasynda sýdyń deńgeıi túsip jatyr. Novonıkolskoe eldi mekeniniń mańynda da Esildiń deńgeıi túse bastady. Petropavlǵa sý áli kelip jatyr, asyp ketpeýi úshin taǵy bir metrge bógetti bıiktetemiz. Adamdardan bólek aýyr tehnıkany da jumyldyrdyq, — dedi SQO TJD bastyǵy Jomart Asqarov.
SQO Tótenshe jaǵdaılar departamentiniń baspasóz hatshysy Evgenıı Jýravlevtiń aıtýynsha, jumys túni boıy toqtaǵan joq. Qazir de munda adamdar qaptap, bógettiń bıiktigin ósirip jatyr.
Buǵan deıin SQO-da Prıbrejnoe eldi mekenine kiretin joldyń jabylǵanyn jazǵan edik.