Sý tasqyny. Bozymbaev Qulsary, Atyraý jáne Aqtóbe oblystaryndaǵy qaýipti aımaqtardy tekserdi
ASTANA. KAZINFORM — Vıtse-premer Qanat Bozymbaev jumys sapary barysynda Jylyoı aýdany men Qulsary qalasynyń sý tasqynyna daıyndyǵyn tekserip, aýyldardaǵy jaǵdaımen tanysty.
QR Úkimetiniń baspasóz qyzmetiniń habarlaýynsha, Jylyoı aýdany qaýipti aımaqta ornalasqan jáne jyl saıyn kóktemde sý tasqynyna ushyraıdy. Sý tasqyny qaýpiniń negizgi sebebi uzyndyǵy 212 shaqyrymǵa sozylǵan Jem ózeni. Ózen jaǵalaýy men Qulsary qalasy arasynda qorǵanys bógetteri salynyp jatyr, onyń jalpy uzyndyǵy 65 km. Qurylys jumystaryna 136 arnaıy tehnıka jumyldyrylǵan. Qazirgi tańda sý negizinen tereńdetilgen Jem ózeni arqyly ótýde. Qulsary qalasynda kúndelikti baqylaý júrgizilýde. Atyraý oblysynyń ákimi Serik Shápkenov jaǵdaı týraly baıandap, qalada jaǵdaı turaqty ekenin málimdedi.
Qulsarydan bólek, sý basý qaýpi bar aımaqqa eki aýyldyq okrýg kiredi: Jem jáne Qaraarna. Qanat Bozymbaev Turǵyzba jáne Shoqpartoǵaı aýyldaryndaǵy jaǵalaýdy bekitý jumystarymen tanysyp, keıin Jem ózeniniń jaǵalaýyn jáne Qursaı kanalyn nyǵaıtý jumystary júrip jatqan aýmaqty aralady. Sondaı-aq, jalpy uzyndyǵy 95 shaqyrymdy (Jem — 48,9 km, Kúrsaı — 46,1 km) qamtıtyn túbin tereńdetý jumystary júrgizilýde. Qazirgi ýaqytta Jem ózeniniń túbin tereńdetý tolyq aıaqtaldy.
Jylyoı aýdanynda barlyǵy 255 arnaıy tehnıka jumyldyrylǵan. Dambalardaǵy jaǵdaıdy táýlik boıy baqylaý úshin kezekshilik beketteri uıymdastyryldy. Sonymen qatar, aýdanǵa Mańǵystaý oblystyq TJD-nan, Atyraý jáne Aqtóbe oblystarynyń Qorǵanys mınıstrliginiń áskerı bólimderinen, sondaı-aq Atyraý oblystyq polıtsııa departamentinen qosymsha kúshter men tehnıka jiberildi.
Qanat Bozymbaev Aqtóbe oblysynyń Baıǵanın aýdanynyń Mııaly aýyly men Oıyl aýdanyndaǵy jaǵdaımen de tanysty. Munda erekshe baqylaýda turǵan Oıyl ózeninde tazalaý jáne tereńdetý jumystary jalǵasýda.
Odan keıin vıtse-premer Atyraý oblysy, Qyzylqoǵa aýdanynyń Mııaly aýylyna baryp, Saǵyz aýylyndaǵy jaǵalaýdy bekitý jumystaryn baqylady. Qyzylqoǵa aýdany arqyly Noǵaıty, Oıyl jáne Saǵyz ózenderi ótedi, olar kóktemgi sý tasqyny kezinde úlken qaýip tóndiredi. Qorǵanys sharalary aıasynda 54 km bóget nyǵaıtylyp, 8 km ózen arnalary tazartylyp, tereńdetildi.
Oblys ákimdigine aımaqtaǵy tótenshe jaǵdaılardyń aldyn alý jáne joıý boıynsha barlyq josparlanǵan sharalardy aıaqtaý, sý tasqyny qaýpi tolyq joıylǵansha táýlik boıy jumys isteýdi jalǵastyrý jáne turǵyndardy kún saıyn jaǵdaı týraly habardar etip otyrý tapsyryldy.
Buǵan deıin Jem ózenimen Atyraý oblysyndaǵy Jylyoı aýdanynyń aýmaǵyna sý kele bastaǵany habarlandy. Sýdyń qatty aǵysy ózenniń jaǵalaýyndaǵy topyraqty qulatyp jatyr.