Sý tasqyny boıynsha naqty boljam 1 naýryzda daıyn bolady — vıtse-mınıstr

ASTANA. KAZINFORM — Sý resýrstary jáne ırrıgatsııa birinshi vıtse-mınıstri Nurlan Aldamjarov sý tasqyny qaýpi qaı óńirlerde bar ekenin, aldyn alý úshin qandaı sharalar qolǵa alynǵanyn aıtyp berdi. 

— 1 aqpanda «Qazgıdromet» RMK aldyn ala boljam jarııalady. Osy boljamǵa sáıkes, tasqyn sý qaýpi joǵary aımaqtar qatarynda Aqmola, Soltústik Qazaqstan, Shyǵys Qazaqstan jáne Qaraǵandy oblystary bar. 1 naýryzda «Qazgıdromet» taǵy da naqtylanǵan boljam usynady. Sol kezde naqty qandaı óńirlerde qandaı qaýipter bar ekeni aıqyn kórinedi, — dep jaýap berdi Nurlan Aldamjarov tilshi suraǵyna.

Gıdrotehnıkalyq qurylystar boıynsha barlyq nysan sý tasqyny kezeńine daıyn. Qajetti tekserýler tolyq júrgizilgen. Sý qoımalarynda shamamen 14,5 mlrd tekshe metr kóleminde bos oryn bar.

— Al «Tasqyn» aqparattyq júıesine qatysty jumysty Jasandy ıntellekt mınıstrligi júrgizedi. Biz sý qoımalarynyń jumys rejımderi jóninde derekterdi kún saıyn engizip otyramyz. Osy málimetter negizinde mınıstrlik mamandary modeldeý júrgizedi jáne sý tasqyny kezeńi aldynda tıisti boljamdy bizge beredi, — dedi vıtse-mınıstr.

Buǵan deıin Nurlan Aldamjarov Soltústik Araldy saqtaý jobasyna Qazaqstan qansha qarajat bólgenin aıtqan edi.