Sý tasqyny — 2024: Oralda úısiz qalǵan turǵyn quqyǵyn qorǵap shyqty
ORAL. KAZINFORM — Batys Qazaqstan oblysynyń mamandandyrylǵan aýdanaralyq ákimshilik sotynda Oral qalasy ákiminiń áreketine qatysty ákimshilik is qaraldy.
BQO sotynyń baspasóz qyzmetinen málim etkenindeı, Oral qalasy ákiminiń 2024 jylǵy 26 naýryzdaǵy № 7 sheshimimen shahar aýmaǵynda tabıǵı sıpattaǵy tótenshe jaǵdaı jarııalanǵan. Osyǵan baılanysty Oral qalasynda zardap shekken azamattarǵa keltirilgen zalaldy baǵalaý jáne turǵyn úımen qamtamasyz etý jónindegi komıssııalar qurylǵan.
Talap qoıýshy turǵyn 2014 jyldan beri Oral qalasy «Komarov» baý-baqsha seriktestigindegi saıajaı úıinde maýsymdyq turǵyn úı retinde turyp kelgen. 2024 jylǵy kóktemgi sý tasqyny saldarynan atalǵan turǵyn úı ishindegi múlkimen birge tolyqtaı jaramsyz kúıge túsken.
Saıajaı turǵyny baspanamen qamtamasyz etý jóninde Oral qalasy ákimdigine ótinish bildirgenimen, komıssııanyń 2025 jylǵy 11 shildedegi № 275 hattamalyq sheshimimen turǵyn úı turǵynjaı retinde paıdalanylmaǵan degen ýájben bas tartylǵan. Bul sheshimge joǵary turǵan organǵa berilgen shaǵym da qanaǵattandyrylmaǵan.
Іsti qaraý barysynda sot «Azamattyq qorǵaý týraly» zańnyń, Úkimettiń № 1222 jáne № 1358 qaýlylarynyń normalaryn taldaı otyryp, talap qoıýshynyń saıajaı úıin uzaq ýaqyt boıy maýsymdyq turǵyn úı retinde paıdalanǵanyn, onyń basqa turǵyn úıi bolmaǵanyn jáne sý tasqyny saldarynan jalǵyz turǵyn úıinen aıyrylǵanyn anyqtady. Bul mán-jaılar kommýnaldyq tólemder, seriktestik tóraǵasynyń anyqtamasy, kýágerlerdiń aıǵaqtary jáne fotomaterıaldarmen rastaldy.
Sot jaýapkerdiń saıajaı úıi turaqty turý úshin paıdalanylmaǵan degen dálelderin negizsiz dep tanydy.
— Nátıjesinde sot komıssııanyń 2025 jylǵy 11 shildedegi № 275 hattamalyq sheshimin zańsyz dep tanyp, kúshin joıdy. Oral qalasynyń ákimine talap qoıýshynyń ótinishin qaıta qarap, buzylǵan quqyqtaryn qalpyna keltirý jáne tıisti ákimshilik akt qabyldaý mindetteldi. Sonymen qatar talap qoıýshyǵa tólengen memlekettik baj qaıtarylatyn boldy. Sot sheshimi bıylǵy 20 qańtarda kúshine endi. Sheshim osy kúnnen bastap belgilengen merzimde oryndalýy tıis, — dep habarlady vedomstvodan.
Eske sala keteıik, budan buryn Oral turǵyny úıi sýǵa ketkende berilgen páterdi ákimdik qaıtaryp almaqshy bolǵanyn jazǵan edik.
Sondaı-aq úıi sýǵa ketken turǵyndy sotqa bergen BQO ákimdigi aryzyn qaıtyp aldy.