Sý tasqynyna daıyndalmaǵanda qanshama adamymyzdy joǵaltyp alar edik — TJM
ASTANA. KAZINFORM — Qazirgi ýaqytta da sý tasqynyna daıyndyq júrgizilip jatyr. Bul týraly Tótenshe jaǵdaılar vıtse-mınıstri Baýyrjan Syzdyqov aıtty.
«Qazirdiń ózinde sý tasqynyna naǵyz daıyndyq ústindemiz. Eger biz daıyn bolmaǵan kúnde, Qudaı saqtasyn, sheteldegideı sý tasqynynan qanshama adamymyzdy joǵaltyp alar edik. Al búgingi tańda shúkir dep aıtý kerek, birde-bir adam shyǵyny joq. Demek, kúshter men quraldardyń daıyndyǵy boldy», — dedi vıtse-mınıstr Úkimet otyrysynan keıingi brıfıngte.
Sonymen qatar ol Arqalyq qalasynda turǵyndardy evakýatsııalaýǵa barǵan tikushaqtyń janar-jaǵarmaı bolmaǵandyqtan qańtarylyp turǵany týraly aqparattyń jalǵan ekendigin aıtty.
«Tótenshe jaǵdaılar mınıstrliginde, áýejaılarda tikushaqtarǵa janar-jaǵarmaı quıatyn avtokólikter bar. Olarda jetkizý máselesi boldy. Sebebi, keıbir joldarmen júrý qıyndyqqa soqty», — dedi Baýyrjan Syzdyqov.
