Sý tapshylyǵy Ortalyq Azııanyń ekonomıkalyq ósimin tejeıdi — BUU

TAShKENT. KAZINFORM — Ózbekstan astanasynda «Ortalyq Azııadaǵy sý dıplomatııasy: másele, sheshim jáne yntymaqtastyq» atty ǵylymı-tájirıbelik konferentsııa ótti, dep habarlaıdy Kazinform agenttiginiń menshikti tilshisi.

Іs-sharaǵa beldi halyqaralyq sarapshylar, Ózbekstan ekologııa mınıstrliginiń ókilderi, depýtattar men Birikken Ulttar Uıymynyń Damý baǵdarlamasy ókildiginiń mamandary qatysty.

BUU-nyń zertteýine sáıkes, aldaǵy jyldary Syrdarııa men Ámýdarııa ózenderiniń sýy 15 paıyzǵa deıin azaıýy múmkin. Tıisinshe, bul Ortalyq Azııa elderiniń ekonomıkalyq damýyna teris áser etedi. Atap aıtqanda, sý tapshylyǵynan aımaqtyń jalpy ishki ónim kólemi (JІÓ) 11 paıyzǵa qysqarýy yqtımal.

Sarapshylar máseleniń sheshimi retinde óńirdegi yntymaqtastyqty nyǵaıtyp, sý dıplomatııasyn damytýdy usynyp otyr. Mamandardyń oıy barlyq taraptyń múddesin eskere otyryp, tıimdi strategııa qabyldaý qajet degenge saıady.

Osy rette BUU sarapshylary sý sharýashylyǵy mamandaryn daıarlaýǵa ekpin túsirý oryndy ekenin atap ótti. Sáıkesinshe uıym Ortalyq Azııa elderine qajetti kadrlardy oqytý, olardyń biliktiligin arttyrý josparyna qoldaý kórsetpek.

Eske salaıyq, taıaýda Kazinform agenttigine suhbat bergen sarapshy Dınara Zıganshına Ortalyq Azııadaǵy sý tapshylyǵy máselesin tek syndarly dıalog arqyly sheshýge bolatynyn aıtty.

Buǵan deıin habarlaǵanymyzdaı, Halyqaralyq tabıǵatty qorǵaý odaǵy Ortalyq Azııadaǵy sý dıplomatııasyn damytýǵa nıetti.

Sonymen qatar Ortalyq Azııa men Aýǵanstan sý sharýashylyǵy salasyndaǵy yntymaqtastyqty nyǵaıtýǵa múddeli.

Bıyl sáýirde Ózbekstannyń Sý sharýashylyǵy mınıstri Shavkat Hamraev Kazinform agenttiginiń menshikti tilshisine suhbat berip, Qazaqstanmen yntymaqtastyqty nyǵaıtýǵa múddeli ekenin málimdegen edi.