Sút tutynýdan damyǵan memleketterdiń úshtigine enip otyrmyz - Ivan Saýer
ASTANA. QazAqparat - Qazaqstan ózin tabıǵı sútpen qamtamasyz ete alady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «Qazaqstannyń et-sút odaǵy» ZTU tóraǵasy Ivan Saýer aıtty.
«Ókinishtisi, sút ónimderi ımportynyń úlesi ótken jyly 2012 jylmen salystyrǵanda ósken. Eger ónim óndirisi statıstıkasyna kóz júgirter bolsaq, onda bári de durys ekendigine kóz jetkizýge bolady. Biz 5,5 mln. tonna sútti ózimizde óndiremiz. Sondyqtan da jan basyna sút tutynýdan damyǵan memleketterdiń úshtigine enip otyrmyz. Biraq, bul mólsherdiń tek tórtten birinen sál astam ǵana ónim óńdeledi», - dedi ol.
Onyń sózine qaraǵanda, elimizdegi shaǵyn taýar óndirýshiler, tipti orta deńgeıdegi taýar óndirýshiler de ónimde qaıta óńdeý protsessinen ajyrap qalǵan. Al elimizdiń kompanııalary, sondaı-aq batystyń iri kompanııalary Qazaqstan naryǵyna sút ónimderin shyǵarýǵa arnalǵan shıkizatty, ıaǵnı qurǵaq maısyz sútti kóptep jetkizýde. Osy qurǵaq sút elimizde qaıta óńdelip, tutynýshylarǵa usynylyp keledi. «Al elimizdiń ishinde óndiriletin barlyq tabıǵı sútti jınap qaıta óńdeýge qol jetkizer bolsaq, onda biz ózimizdi sútpen tolyq qamtamasyz ete alar edik. Qazirgi tańda resmı statıstıkaǵa sáıkes, 70 paıyzǵa deıin sútti tasymaldap otyrmyz. Bul múldem durys emes», - dedi I.Saýer.
