Sút salasyn sýbsıdııalaý tetikterin qaıta qaraý kerek — depýtat

ASTANA. KAZINFORM — Sút ónimderi ımportynyń artýy qaýpi bar. Bul týraly Parlament Májilisinde mal sharýashylyǵy ónimderin tereń óńdeý taqyrybyna arnalǵan Úkimet saǵatynda depýtat Serik Egizbaev aıtty.

«Sapaly sút shıkizatynyń jetispeýi jáne qaıta óńdeý kásiporyndaryna jyl boıy birkelki túspeýi máselesi bar. Jeke sharýalyqtardan alynǵanyna baılanysty, ákelinetin shıkizattyń 70 paıyzǵa jýyǵynyń sapasy tómen. Jalpy, dándi jáne maıly daqyldardy qospaǵanda, aýyl sharýashylyǵy ónimderin, onyń ishinde et pen sút óndirýdiń barlyq kóleminde 85-90 paıyzy shaǵyn sharýashylyq jáne jeke qosalqy sharýashylyq úlesine tıesili. Kelesi jyldyń basynan bastap Keden odaǵynyń tehnıkalyq reglamentinde kózdelgen sút shıkizatyna qoıylatyn jańa talaptar kúshine engen kezde, bul problema kúsheıe túsedi. Mashınamen saýylmaǵan, salqyndatqysh tankerlersiz, sapa jáne qaýipsizdik zerthanalarynsyz daıyndalǵan sútti eksportqa qabyldaýǵa tyıym salynady. Ýákiletti organdardyń osy máseleni sheshýdiń áli de naqty kózqarasy men is-qımyl jospary joq. Nátıjesinde, sarapshylardyń boljamy boıynsha sút ónimderiniń ımporty búgingi 40 paıyzdan 80-90 paıyzǵa deıin ósýi yqtımal», — dedi S. Egizbaev.

Onyń aıtýynsha, bul rette otandyq óndirýshilerge ımporttyq qurǵaq sút qunynyń tómen bolýyna baılanysty osy sút túrin satý tıimdirek bolady. Jergilikti zaýyttar qurǵaq sútke degen qajettilikti tek 15 paıyzǵa ǵana jabady, tıisinshe jergilikti óndirilgen sút-shıkizaty suranysqa ıe bolmaı qaldy. 

«Belgilengen problemalardy sheshý úshin shaǵyn sút óndirýshilerdi kooperatsııaǵa birigiýdi yntalandyrý boıynsha pármendi sharalar ázirleý qajet. Tereń óńdelgen ónimder shyǵarý úshin jeke sharýalyqtardyń sút-shıkizatynan qurǵaq sút óndirý máselesin qarastyryp, sút óńdeýshi kásiporyndar úshin onyń qunyn sýbsıdııalaý máselesin qarastyrǵan jón», — dedi depýtat.

Onyń paıymynsha, ınvestıtsııalyq sýbsıdııalaý qaǵıdalaryna qurǵaq sút óndirý boıynsha jobanyń jeke pasportyn engizý máselesin sheshý kerek. Budan basqa, sútti tereń óńdeýdi yntalandyrýǵa basa nazar aýdara otyryp, sút salasyn sýbsıdııalaý tetikterin qaıta qaraý usynyldy.

Budan buryn habarlanǵandaı, Aýyl sharýashylyǵy mınıstri Aıdarbek Saparov keıingi bir jylda sút ónimderiniń ımporty artqanyn aıtty.