Sút ónimderiniń básekege qabilettiligin kóterý úshin óńdeýshi salaǵa qoldaýdy arttyrý qajet

Búgin elimizdi sapaly ári qaýipsiz sút ónimderimen qamtamasyz etý, salanyń básekege qabilettigin arttyrý sharalaryna arnalǵan konferentsııa barysynda jýrnalısterge bergen suhbatynda Qazaqstan Sút odaǵynyń atqarýshy dırektory Vladımır Kojevnıkov osylaı málim etti, dep habarlaıdy QazAqparat.

«Qazaqstannyń sút ónimderi sapasy jaǵynan Reseıdiń de Belarýstyń da ónimderinen kem túspeıdi. Degenmen, baǵaǵa qatysty básekelestikte birqatar nazar aýdaratyn máseleler barshylyq. Baǵa básekesinde Belarýstyń sút ónimderi aldyńǵy orynda tur. Sondyqtan da, Qazaqstan sút odaǵy aǵymdaǵy jylǵa arnalǵan elimizdiń sút ónimderin óndirýshilerdi qoldaýǵa arnalǵan baǵdarlama ázirlemek. Bul baǵytta Úkimettiń atyna birqatar usynystar qamtylatyn bolady», dedi Qazaqstan Sút odaǵynyń atqarýshy dırektory Vladımır Kojevnıkov.

Onyń aıtýynsha, Qazaqstanda óndiriletin súttiń jyldyq mólsheri belarýstardyń mólsherimen shamalas. «Degenmen, belarýstar óndirgen súttiń 95 paıyzyn kásiporyndar arqyly qaıta óńdeýden ótkizip, saýdaǵa shyǵarady. Al Qazaqstanda óńdeletin sút kórsetkishi 2009 jyly bar bolǵany 24 paıyzdy ǵana qurady. Al osy máseleniń saralap qarasaq, Belarýs elinde burynǵy kezderden beri sút óńdeıtin iri kásiporyndar, fermalar men ujymsharlar saqtalǵan. Al bizdiń elimizde bundaı iri kásiporyndar joqtyń qasy. Sondyqtan da elimizde sút ónimderin shyǵaratyn zaýyttardy, iri fermalardy qurý qajet. Jalpy, Batys eýropa elderinde súttiń 90 paıyzy zaýyttarda óńdeledi, biz de osyǵan qaraı umtylýymyz kerek», dedi V. Kojevnıkov.