Sút ónimderi ımporttyq qaptamalar esebinen qymbattady - Qumar Aqsaqalov

NUR-SULTAN. QazAqparat – Soltústik Qazaqstan oblysynyń ákimi Qumar Aqsaqalov QR Premer-Mınıstri Álıhan Smaıylovqa óńirde sút ónimderi baǵasynyń ósý sebepteri týraly baıandady, dep habarlaıdy QazAqparat tilshisi.

QR Premer-Mınıstri Álıhan Smaıylov azyq-túlik baǵasynyń qymbattaýyna qatysty ótken arnaıy jıynda Soltústik Qazaqstan oblysynda sút óndirisin damytýǵa memleket tarapynan qyrýar qarjy bólinip, birneshe zaýyt salynǵanyna qaramastan, baǵanyń turaqsyz bolyp turǵanyn synady.

«Sizderge sońǵy eki jylda sút-taýarly fermalardy salýǵa biraz aqsha bóldik. Siz bizge bir jylda 10 ferma ashtyq dep baıandap berip otyrsyz. Al qazir óńirde maıdyń, aıran men irimshiktiń baǵasy ósken. Buǵan ne sebep?»

- dep surady Úkimet basshysy.

Oblys ákiminiń aıtýynsha, ótken aptada sút ónimderiniń baǵa ındeksi – 101,9 bolǵan.

«Jyl basynan beri baǵa ındeksi - 110,7. Respýblıkadaǵy ortasha ındeks – 112,4. Bizdiń ındeksimiz ekinshi orynda. Osyndaı tómen ındeksti jyl aıaǵyna deıin ustap otyrýǵa múmkindigimiz bar. Ony eseptep otyrmyz. Sońǵy 2 jyl ishinde sút ónimderi boıynsha respýblıkadaǵy tómen baǵalardyń birin ustap otyrmyz. Biraq esepti aptada aırannyń baǵasy – 14,3, súzbe – 9,5, sary maı 5,3 paıyz qymbattady. Sebebi, shetelden jetkiziletin jabyn 76 paıyz, qaptama materıaly 30 paıyz, jabdyqtyń qosalqy bólshekteri 50 paıyz qymbattady. Munyń bári – ımporttyq zat. Biraq bul ósim jyl aıaǵyna deıin bolmaıdy. Qazir tómendetip jatyrmyz»

, - dedi Qumar Aqsaqalov.

Aıta keteıik, Álıhan Smaıylov atalǵan jıynda óńir ákimderiniń azyq-túlik baǵasyn jetkilikti baqylaı almaı otyrǵanyn synǵa aldy.