Sút óndirisinde qaı óńir alda? Jańa statıstıka shyqty
ASTANA. KAZINFORM — 2026 jylǵy qańtar-tamyz aılarynda Qazaqstanda 441,3 myń tonna óńdelgen sút óndirildi.
Ulttyq statıstıka bıýrosynyń baspasóz qyzmeti málim etkendeı, bul 2025 jyldyń sáıkes kezeńimen salystyrǵanda 0,2%-ǵa artyq (440,5 myń tonna).
— Osy kezeńde óndiristiń eń joǵary kólemi Soltústik Qazaqstan oblysynda (120,8 myń tonna), Aqmola (96,2 myń tonna), Almaty (64,7 myń tonna) jáne Qostanaı (43,0 myń tonna) oblystarynda tirkeldi, — delingen resmı aqparatta.
Al 2025 jyldyń qorytyndysy boıynsha elde 671,0 myń tonna óńdelgen sút óndirildi. Bul 2024 jylmen salystyrǵanda 6,2%-ǵa artyq.
2026 jylǵy qańtar-shilde aılarynda óńdelgen sút eksporty 2,9 myń tonnany qurady, bul 2025 jyldyń sáıkes kezeńimen salystyrǵanda 3,0%-ǵa joǵary (2,8 myń tonna). Eksporttyń negizgi baǵyttary Reseı (2,24 myń tonna), Ózbekstan (307,9 tonna) jáne Tájikstan (194,0 tonna) boldy.
Osydan buryn ǵalymdar sút jáne ósimdik maılarynan jańa ónim jasaǵanyn jazǵanbyz.
