Sút bezi qaterli isigine shaldyqqan áıelder sany artyp otyr
ASTANA. 9 qazan. QazAqparat - Sońǵy ýaqytta álemde, sonyń ishinde Qazaqstanda sút beziniń qaterli isigine shaldyqqan áıelder sany artyp keledi.
Bul týraly búgin Astanada sút bezi qaterli isiginiń dıagnostıkasyndaǵy radıologııalyq tehnologııanyń róline arnalǵan konferentsııa barysynda densaýlyq saqtaý mınıstrligi Ǵylym jáne adamı resýrstar departamentiniń dırektory, professor Murat Tóleýov málim etti.
«Búgingi tańda densaýlyq saqtaý salasyndaǵy asa ózekti máselelerdiń biri bosanatyn áıelderdiń aǵzalaryndaǵy kezdesetin aýrýlar, onyń ishinde sút beziniń qaterli isigi bolyp otyr. Ókinishke qaraı, sońǵy ýaqyttaǵy statıstıkalyq málimetter álemde de, sonyń ishinde Qazaqstanda da sút beziniń qaterli isigine shaldyqqan áıelder sanynyń artyp otyrǵanyn kórsetýde», - deıdi professor M. Tóleýov.
Onyń aıtýynsha, bundaı jaǵdaılar álemdik dárigerler qaýymdastyǵyn alańdatyp, qaterli isikten saqtanýdyń tıimdi joldaryn izdenýge májbúrleýde.
«Qazirgi tańda Qazaqstanda sút bezi qaterli isigin erte bastan anyqtaýǵa baǵyttalǵan keshendi sharalar júzege asýda. Qazaqstandyq skrınıng baǵdarlamasynyń mańyzdy baǵyttarynyń biri radıologııalyq dıagnostıka tehnologııasyn jetildirý bolyp otyr», - deıdi professor.
Eske sala keteıik, Astanada óz jumysyn bastaǵan konferentsııaǵa Avstrııa, Germanııa, Belgııa, Chehııa, Italııa, Túrkııa, Egıpet, Gollandııa, Reseı, Ózbekstan men Qyrǵyzstan elderinen kelgen iri ǵalym-radıologtar bas qosýda. Eki kúnge jalǵasatyn alqaly otyrysta álemniń jetekshi ǵalymdary qazaqstandyq áriptesterimen birlesip, radıologııa tehnologııalaryn engizý salasynyń aldyńǵy qatarly tájirıbelerimen bólisetin bolady. Konferentsııa aıasynda sút bezi qaterli isigin erte anyqtaý boıynsha sheberlik sabaqtary ótkiziledi dep kútiledi.
