Sút bezi obyryna qarsy kúres: Astanada 300 adam Pink Run jarysyna qatysty
ASTANA. KAZINFORM - Álemde "Qyzǵylt qazan" degen atpen belgili sút bezi obyryna qarsy kúres aıy aıasynda Astanada alǵash ret Pink Run jarysy uıymdastyryldy, dep habarlaıdy elorda ákimdiginiń resmı saıty.
Jarysqa 300-den astam adam qatysty. Sondaı-aq aktsııany qazaqstandyq aýyr atlet, úsh túrli salmaq dárejesinde tórt dúrkin álem chempıony Ilıa Ilın jáne qazaqstandyq qara kúsh ıesi, kúshtik nómirler boıynsha tórt dúrkin álem rekordshysy, Gınnes kitabynyń rekordshysy Sergeı Tsyrýlnıkov qoldady.
Áýesqoı sportshylar jarys barysynda 1,3 jáne 3,9 km qashyqtyqty eńserdi. Eki jarysta da márege birinshi bolyp kelgen adamǵa 20 000 teńge somasynda aqshalaı sertıfıkat tabystaldy.
"Búgingi jarystyń barlyǵy derligi uıymdastyrýshysy, onkologtar, mammologtar. Bizdiń maqsatymyz - sút bezi qaterli isigi týraly aqparatty kópshilikke jetkizý jáne barlyq áıelderdi ýaqtyly tekserýden ótýge shaqyrý. Sebebi sút bezi qaterli isiginiń erte satysynda ýaqtyly dıagnoz qoıylǵan kezde patsıentterdiń tolyq emdelýi 95 paıyzǵa jetedi. Men sizdiń densaýlyǵyńyzǵa beı-jaı qaramaýdy suraımyn. Kóptegen jaǵdaılarda sút bezi qaterli isigi 40 jastan asqan áıelderge áser etse de, ol jyl saıyn jasarady. Mysaly, Qazaqstanda 2023 jyly ǵana osy aýrýmen aýyrǵan 1000-nan astam adam 40 jasqa tolmaǵan. Búgingi sporttyq is-sharaǵa qatysqandardyń barlyǵyna zor densaýlyq pen tabys tileımin", - dedi jarysty uıymdastyrýshy Dılıara Qaıdarova.
Aıta ketý kerek, 40 jastan asqan áıelder úshin gınekolog pen mammologtyń tekserýi tegin.
Sondaı-aq is-shara barysynda sút bezi obyryna shaldyqqan Gúlim Ábýshkenovaǵa 500 000 teńge somasyndaǵy sertıfıkat saltanatty túrde tabys etildi.
"Men bul dertke 2 jyl buryn shaldyqtym. Sońyna deıin kúresýge bel býdym, óıtkeni balalarymdy jalǵyz ózim ósirip jatyrm. 2 jylǵa jýyq ýaqyt boıy ártúrli tekserý men protsedýralardyń arqasynda ómir súrip kelemin. Men búgin tańerteń kelip, aktsııany qoldaǵan barsha qatysýshyǵa rızamyn", - dedi Gúlim Ábýshkenova.
Jarys aıaqtalǵannan keıin qatysýshylarǵa ystyq shaı usynyldy, sonymen qatar demeýshilerdiń syılyqtarymen utys oınatyldy.
Sonymen qatar is-sharaǵa qatysýshylar "Taza Qazaqstan. Astana - tazalyq pen tártiptiń úlgisi" ekoaktsııasy aıasynda jarystan keıin qoqysty tazartyp tastady.
