Sýsyz qalǵan Balqash: Oblys ákimi qyzmettik tergeý júrgizýdi tapsyrdy

BALQASh. QazAqparat - Qaraǵandy oblysynyń ákimi Ermaǵanbet Bólekpaev Balqash turǵyndaryn eki táýlikke sýsyz qaldyrǵan apatqa baılanysty qyzmettik tergeý júrgizýdi tapsyrdy, dep habarlaıdy QazAqparat óńir ákimdigine silteme jasap.

Oblys basshysy bolǵan oqıǵanyń sebepterin anyqtap, jaǵdaı qaıtalanbaý úshin barlyq qajetti sharany qabyldaýdy talap etti.

Balqashqa jumys sapary barysynda Ermaǵanbet Bólekpaev apat bolǵan jerge bardy. Sodan keıin qalalyq máslıhat depýtattarymen kezdesýde jaǵdaıdy talqylady.

«»Balqash sý«basshylyǵy óziniń qabiletsizdigin kórsetti dep sanaımyn. Belgili bolǵandaı, qaqpa klapany osy ýaqytqa deıin sýdyń astynda bolǵan. Nege tekserilmegen? Mekeme basshysynyń atqaratyn laýazymyna sáıkestigin qarastyrýdy tapsyramyn. Qyzmettik tergeý júrgizińizder. Jobany kóterińizder, eger qateler bolsa, bárin túzetý kerek. Barlyǵyn eki ret tekserińizder. Áreket etińizder!», – dedi oblys ákimi.

Sonymen qatar E.Bólekpaev kommýnaldyq qyzmetter jabdyqtarynyń tozýy jáne qurylǵylar tapshylyǵy problemasyna nazar aýdardy.

Kezdesýde qala men Balqash kýrorttyq aımaǵynyń bolashaǵy talqylandy. Balqashtyń Áleýmettik-ekonomıkalyq damýynyń 2023–2027 jyldarǵa arnalǵan keshendi jospary ázirlendi.

Mańyzdy mindetterdiń biri – týrıster aǵynyn arttyrý. Ol úshin ınfraqurylymdy jaqsartý qajet.

Bıylǵy jyly qala jaǵalaýyn abattandyrý bastalady. Ermaǵanbet Bólekpaevqa eki jylǵa eseptelgen joba usynyldy. Onyń aıasynda balalar men sport alańdaryn, kúrkesheler ornatý, sondaı-aq demalýshylar úshin basqa da qolaıly jaǵdaılar jasaý kózdelgen.

«Aqsha bólindi, ony ýaqytynda bastaý kerek. Jumystyń sapasyn qadaǵalańyzdar. Kabınetterińizde otyrýdyń qajeti joq, syrtqa shyǵyp, muqııat baqylańyzdar!», – dep Ermaǵanbet Bólekpaev qala basshylyǵyna talap qoıdy.

Oblys ákimi Balqashta salynyp jatqan úılerdiń sapasyn da tekserdi. Bıyl qalada kezekte turǵandar úshin eki kópqabatty úı tapsyrylýy tıis.

Sonymen qatar, óńir basshysy kúrdeli jóndeýdi qajet etetin burynǵy kolledj ǵımaratyn aralap kórdi.

Eske salaıyq, Balqash qalasynda 80 myńǵa jýyq turǵyn eki táýlikke jýyq aýyz sýsyz otyrdy. Oǵan magıstraldy qubyrdaǵy apat sebep boldy. Jóndeý jumystary aıaqtaldy. Búgin qalaǵa sý kezeń-kezeńimen berile bastaıtyny habarlandy.