Sýsymaly teri sındromyna shaldyqqan Ernarǵa ota jasaldy
ALMATY.QazAqparat - Almatyda 6 jasar Ernar Álibekovke blefaroplastıka jasaldy, dep habarlaıdy QazAqparat tilshisi.
Ernarǵa «qabaqtyń qaıyrylýy» dıagnozy boıynsha jasalǵan ota sátti shyqqan.
«Kirpigi ishine qaraı ósip bara jatqan soń, qabaǵyna ota jasaý kerek boldy. Túsip turatyn qabaǵyn kótergennen keıin, kirpikteri de syrtqa qaıyryldy. Kózderi ashylyp, dop-domalaq bolyp qaldy. Áli betiniń isigi qaıtqan joq, kógerip tur. Bári jaqsy bolsa, 20 tamyz kúni jipterin sheshemiz. Otany tek kóziniń ústińgi jaǵyna ǵana jasadyq, astyńǵy bóligin emdeý kúrdelirek boldy. Otany kvota arqyly jasatpaq edim, biraq kútýge týra keldi. Bala bolsa qınalyp ketti. Sondyqtan aqyly operatsııaǵa júgindim. 112 myń teńgege shyqty»,-dedi Zebınsa Tólebergenova.
Anasynyń Zebınsanyń aıtýynsha, Ernar 40 mınýtqa sozylǵan emdeý sharasyn oıdaǵydaı ótkergen.
«Qujattarymyzdy jınap, daıyndalyp kelgenimizge qaramastan dárigerler alǵashynda ota jasaýdan bas tartty. Keıin asqynýlar bolyp, basqa da aǵzalaryna zaqym keletinin aıtsa da táýekelge bardyq. Artynan barlyq operatsııa komandasymen sóılesip, ruqsat aldyq. Ádette 15-20 mınýtqa sozylatyn ota bizdiń Ernar úshin 40 mınýtqa sozyldy. Kóp qınalǵan joq, 1 kúnnen keıin balalarǵa qosylyp oınap ketti. Astanaǵa keldik»,-dedi anasy.
Anasynyń sózinshe, dárigerler tek 18 jastan keıin ǵana kelbetin qalpyna keltirý úshin plastıkalyq ota jasaýǵa keńes bergen.
