Sustainable Fitch Otbasy bankiniń turaqty damý reıtıngin kóterdi
ASTANA. KAZINFORM – «Báıterek» holdınginiń enshiles uıymy – Otbasy bank halyqaralyq Sustainable Fitch agenttiginen jańartylǵan baǵasyn aldy. Bank baǵasy 55 balldan 60 ballǵa deıin ósti. ESG reıtıngi deńgeıi «3» deńgeıinde rastaldy. Baǵanyń kóterilýi bank áleýmettik baǵdarlamalardy tabysty damytyp, óziniń ESG bastamalary týraly ashyq aqparat berip, turaqty damý qaǵıdattaryn jumysynda tıimdi engizip kele jatqanyn kórsetedi.
Sustainable Fitch sarapshylary Otbasy bankiniń qyzmeti aıtarlyqtaı áleýmettik áserge ıe ekenin atap ótti. Bank Qazaqstannyń memlekettik turǵyn úı saıasatyn iske asyrýda mańyzdy ról atqarady.
Bıyl «Otbasy bank» múmkindigi shekteýli balalary bar 348 otbasyǵa jáne 1 men 2 toptaǵy múmkindigi shekteýli 372 adamǵa qonys toıyn toılaýǵa kómektesti. Olarǵa berilgen nesıelerdiń jalpy somasy 8,5 mıllıard teńgeni qurady. 2025 jyly barlyǵy áleýmettik jaǵynan osal toptarǵa jeńildetilgen nesıe berý boıynsha 1 577 nesıe rásimdeldi. Olardy turǵyn úımen qamtamasyz etýdiń jalpy aýdany 101 240 sharshy metrdi qurady.
Qazir banktyń nesıe portfeli 3,83 trıllıon teńgeni quraıdy, bul eldegi jalpy ıpotekalyq portfeldiń 51%-yna teń. Bank Qazaqstandaǵy ekonomıkalyq turǵydan belsendi halyqtyń 32,9%-yna qyzmet kórsetedi. Ol aktıvteri men menshikti kapıtaly boıynsha ekinshi deńgeıli bankter arasynda tórtinshi orynda tur, jalpy nesıe portfeli – 3,8 trıllıon teńge.
2025 jylǵy 1 qarashadaǵy málimet boıynsha, bank ónimderiniń arqasynda 62 363 qazaqstandyq otbasy qoljetimdi nesıe alyp, jańa baspanaǵa qonystandy.
Turǵyn úı qurylys jınaq júıesiniń qatysýshylarynyń sany 3,2 mıllıon adamdy quraıdy. Banktiń depozıttik portfeli – 2,6 trıllıon teńge.
2025 jyldyń on aıynda rekordtyq kórsetkishke qol jetkizilip, 739 913 adam Otbasy bankte jańa depozıt ashqan. Olar osylaısha baspana alý úshin eldegi eń tómen paıyzdyq mólsherlememen nesıe alý maqsatynda qarajat jınaýdy bastaǵan.
Bank turaqty qarjylandyrý portfelin belsendi túrde damytyp keledi: «jasyl» ıpotekanyń úlesi 0,9%-ǵa (30,7 mlrd teńge) deıin ósti, al áleýmettik ıpotekalyq baǵdarlamalar portfeldiń 39%-yn quraıdy.
Banktiń negizgi ónimderiniń qatarynda – «Naýryz» baǵdarlamasy men «Naýryz jumysker» baǵyty, «Dıplommen – aýylǵa» jobasy, sondaı-aq jeńildetilgen memlekettik baǵdarlamalar, óńirlik jáne korporatıvtik jobalar bar. Olardyń barlyǵy jas otbasylardy, zaýyt pen kásiporyn qyzmetkerlerin, aýyl turǵyndaryn jáne áleýmettik osal top ókilderin qoldaýǵa baǵyttalǵan.
Banktiń osy jáne basqa da jobalary BUU bekitken Turaqty damý maqsattaryna qol jetkizýde mańyzdy ról atqarady. Olarǵa kedeılikti azaıtý, ómir súrý deńgeıin kóterý, ekonomıkalyq ósýdi qamtamasyz etý, teńsizdikti qysqartý, sondaı-aq turǵyn úı tapshylyǵyn azaıtý jáne áleýmettik osal toptardyń ómir súrý jaǵdaıyn jaqsartý arqyly turaqty qalalar men eldi mekenderdi damytý kiredi.
Sustainable Fitch sarapshylary banktyń táýekelderdi basqarý baǵytyndaǵy jetistikterin de atap ótti: ESG faktorlary táýekel-menedjment júıesine engizilgen, al klımattyq táýekelder stress-test jáne stsenarıılik taldaý arqyly baǵalanady. Agenttiktiń esebinde Otbasy bank «jaqsy deńgeıdegi korporatıvtik basqarýǵa jáne joǵary áleýmettik baǵytqa ıe» dep kórsetilgen.
Oń faktorlardyń qatarynda genderlik teńgerim atalyp ótti – bank qyzmetkerleriniń 58%-yn áıelder quraıdy, sondaı-aq klıentterdiń qanaǵattaný deńgeıi joǵary.
Otbasy bank turaqty damý saıasatyn odan ári damytyp, «jasyl» ónimderdiń sanyn arttyrýdy jáne halyqaralyq standarttarǵa saı eseptiliktiń ashyqtyǵyn kúsheıtýdi jalǵastyrady.