Sý sportynyń bazasy men stadıon: Almatyda qandaı sporttyq nysandar salynady

ALMATY. KAZINFORM — Almatyda jańa sporttyq nysandar boı kóteredi. Bul týraly Kazinform saýalyna bergen jaýabynda qalalyq sport basqarmasy habarlady. 

Almatyda 10 tamyz kúni Djennıfer Lopestiń aýqymdy kontserti ótti. Alaıda merekelik kesh elimizdiń ońtústik astanasynda ótpeýi de múmkin edi. Sebebi eýrokýboktaǵy jarystaryna baılanysty «Qaırat» klýby Ortalyq stadıonda kontsert ótkizýge qarsy boldy. Degenmen, keıin eki tarap kelisimge keldi.

Biraq bul jaǵdaı Almatyda buqaralyq is-sharalar ótkizetin iri nysandardyń jetispeıtinin kórsetti. Onyń ishinde sporttyq alańdar men ortalyqtar bar. Osyǵan baılanysty Almaty qalasynyń sport basqarmasyna saýal joldadyq.

Basqarma basshysynyń orynbasary Bekjan Kenjebaıdyń jaýabyna sáıkes, Almaty qalasynda búgingi kúni 3 590 sporttyq nysan jumys isteıdi. Aldaǵy ýaqytta olardyń sanyn kóbeıtý josparlanyp otyr.

Qazirgi ýaqytta Raıymbek dańǵyly, 312 mekenjaıynda múmkindigi shekteýli jandarǵa arnalǵan basseıni bar sport ortalyǵynyń qurylysy bastalǵan. Nysan qurylysy 2026 jyldyń 1-toqsanynda aıaqtalýy tıis. Sondaı-aq Almatyda jańa stadıon salynbaq.

— Jańa stadıonnyń qurylysy da josparlanyp otyr. 15 gektar jer telimi belgilenip, jobalyq-smetalyq qujattama ázirlenip jatyr, — dedi Bekjan Kenjebaı.

Buǵan deıin stadıon qurylysy úshin jer telimderi memleket qajettiligine alynatynyn jazǵanbyz.

Odan bólek vedomstvo málimetinshe, zamanaýı sý sportynyń bazasynyń jobalyq-smetalyq qujattamasy ázirlendi. Aldaǵy ýaqytta merdiger anyqtalyp, qurylys jumystary bastalady.

Deneshynyqtyrý-saýyqtyrý keshenderi

Bekjan Kenjebaı sport nysandaryn damytý maqsatynda Almaty qalasynyń qurylys basqarmasy 6 deneshynyqtyrý-saýyqtyrý kesheniniń jobalyq-smetalyq qujattamany ázirlenip jatqanyn atap ótti. Onyń ishinde:

1) Naýryzbaı aýdany, «Shuǵyla» shaǵyn aýdany (Sabdenov kóshesi) — basseıni bar sport kesheni. Qurylys jumystary 2025 jyldyń qazan aıynda bastalyp, 2026 jyldyń 3-toqsanynda aıaqtalady.

2) Alataý aýdany, «Saıaly» shaǵyn aýdany — basseıni bar sport kesheni. Qurylys jumystary 2025 jyldyń qazan aıynda bastalyp, 2026 jyldyń 3-toqsanynda aıaqtalmaq.

3) Túrksib aýdany, Maılın kóshesi — basseıni bar sport kesheni. 2025 jyldyń qyrkúıeginde qurlysy bastalyp, 2026 jyldyń sońyna qaraı aıaqtalýy tıis.

4) Naýryzbaı aýdany, «Aqjar» shaǵyn aýdany — deneshynyqtyrý-saýyqtyrý kesheni. Bıyl qarasha aıynda qurylysyn bastap, 2026 jyldyń sońynda iske qosý josparlanǵan.

5) Naýryzbaı aýdany, «Shuǵyla» shaǵyn aýdany (Abaı dańǵyly) — deneshynyqtyrý-saýyqtyrý kesheni. Memlekettik saraptama qorytyndysy 2025 jyldyń qazan aıynda shyǵady. Qurylys jumystary 2026 jyldyń 1-toqsanynda bastalyp, 2027 jyly aıaqtalady.

6) Alataý aýdany, «Qarasý» shaǵyn aýdany — basseıni bar sport kesheni. Memlekettik saraptama qorytyndysy 2025 jyldyń qazan aıynda alynyp, qurylysy 2026 jyly bastalady. Іske qosý 2027 jylǵa josparlanǵan.

— Búgingi kúni 6 deneshynyqtyrý-saýyqtyrý kesheni paıdalanýǵa berildi. Olar «Aınabulaq», «Kemel», «Qulager», «Zerdeli», «Alataý», «Jas Qanat» shaǵyn aýdandarynda ornalasqan. Onda boks, kıkboksıng, karate, qoıan-qoltyq urys, djıý djıtsý, sambo, grepplıng, taekvando, basketbol, voleıbol, kúres júzý syndy sport úıirmeleri bar, — dep atap ótti Bekjan Kenjebaı.

Sport mektepterin jańǵyrtý

Almatyda eskirgen sport mektepteri de jańǵyrady. Sport basqarmasynyń jaýabyna sáıkes, 1974 jyly salynǵan № 9 Olımpıadalyq rezervtegi mamandandyrylǵan balalar-jasóspirimder mektebi kúrdeli jóndeýden ótedi. Qazirgi ýaqytta onda 934 sportshy jattyǵady. Memlekettik saraptamanyń qorytyndysy 2025 jylǵy 21 shildede shyqqan.

Sonymen qatar Sporttaǵy daryndy balalarǵa arnalǵan mamandandyrylǵan mektep-ınternat-kolledjine arnalǵan oqý-sporttyq ǵımarat qurylysyna jobalyq-smetalyq qujattama ázirlengen. Qazirgi ýaqytta memlekettik saraptamaǵa tapsyrý úshin qujattar daıyndalyp jatyr.

Budan bólek Mamandandyrylǵan joǵary sport sheberligi mektebiniń aýmaǵynda ákimshilik korpýs pen qosymsha sport zaldarynyń qurylysy bastalǵan.

— Bul zaldardy qala turǵyndary da paıdalana alady. Qurylys barlyq qurylys jáne seısmıkalyq talaptarǵa saı júrgizilip jatyr. Aıaqtalý merzimi — 2025 jyldyń jeltoqsany, — delingen basqarma jaýabynda.

Eske salaıyq, buǵan deıin Almaty oblysynda qaıtarylǵan aktıvter esebinen jańa sport kesheni salynatynyn jazǵanbyz.