Sýshıla Karkı Nepaldyń alǵashqy áıel premer-mınıstri boldy

ASTANA. KAZINFORM – Nepalda alǵash ret áıel adam úkimet basshysy qyzmetine keldi. Eldiń Joǵarǵy sotynyń burynǵy tóraıymy Sýshıla Karkı ýaqytsha úkimettiń premer-mınıstri retinde ant berdi, dep habarlaıdy Khabarhub.

Resmı ınaýgýratsııa rásimi Katmandýdaǵy prezıdent saraıy – Shıtal Nıvasta ótti. Karkıdiń taǵaıyndalýy áskerıler, prezıdent jáne jaqynda ótken jappaı narazylyqtarǵa bastamashy bolǵan Gen-Z jastar qozǵalysy ókilderi arasyndaǵy eki kúndik kelissózderdiń nátıjesinde júzege asty.

Jańa premer-mınıstr alǵashqy sheshim retinde parlamentti taratý týraly bastama kóterdi. Bul sheshim ant qabyldaý rásiminen keıin ótken jańa mınıstrler kabıneti otyrysynda jarııalandy.

– Parlament taratyldy, prezıdent bul sheshimdi qoldap, qujatqa qol qoıdy. Usynysty men engizdim, olar kelisti jáne maquldady, – dedi Sýshıla Karkı.

Aldaǵy kúnderi ýaqytsha úkimettiń quramy keńeıtiledi dep kútilýde. Karkı bul qadamdy Gen-Z qozǵalysynyń saıası reforma men ınstıtýtsıonaldyq jańǵyrýǵa qatysty uzaq jylǵy talabyn oryndaý baǵytyndaǵy mańyzdy sheshim dep atady.

Sýshıla Karkı Nepalda zańger ári reformator retinde keńinen tanymal. 2016-2017 jyldary ol Joǵarǵy sotty basqarǵan alǵashqy áıel boldy. Sol kezeńde ol jemqorlyqqa qarsy kúreste belsendilik tanytyp, ashyqtyq pen zań ústemdigi qaǵıdattaryn qorǵady.

Eske salaıyq, 8–9 qyrkúıekte Nepalda birqatar messendjerler men áleýmettik jelilerdiń jumysyna shekteý qoıylǵannan keıin jappaı tártipsizdikter oryn aldy. Narazylyqty stýdentter men Gen-Z qozǵalysynyń belsendileri basqardy.

Nepal Densaýlyq saqtaý mınıstrliginiń dereginshe, tártipsizdikter kezinde 51 adam qaza taýyp, 1 myńnan astam adam jaraqat alǵan. Polıtsııa 15 myńnan astam tutqynnyń qashyp ketkenin habarlady. Memlekettik ınfraqurylymǵa keltirilgen shyǵyn $1,4 mlrd-tan asty.

Buǵan deıin Nepalda mınıstrlerdiń tikushaqpen evakýatsııalanǵany týraly habarlanǵan bolatyn.