Sýshı men rolldan qandaı aýrý juǵýy múmkin
ASTANA. KAZINFORM — Sýshı men roll tutyný kezinde qaýipsizdik sharalaryn saqtaý qajet, dep habarlaıdy Sanıtarııalyq-epıdemıologııalyq baqylaý komıtetiniń baspasóz qyzmeti.
Komıtet halyqty sýshı men rolldardy tutyný kezinde saqtyq sharalaryn saqtaýǵa jáne olardy daıyndaıtyn ári satatyn oryndardy tańdaýǵa jaýapkershilikpen qaraýǵa shaqyrady.
Sýshı men rolldar taǵam qaýipsizdigi turǵysynan erekshe nazar aýdarýdy qajet etedi. Olardy daıyndaý kezinde shıki, az tuzdalǵan nemese marınadtalǵan balyq, teńiz ónimderi jáne tez buzylatyn basqa da ıngredıentter paıdalanylýy múmkin. Bul ónimder árdaıym tolyq termııalyq óńdeýden ótpeıdi.
— Daıyndaý, tasymaldaý jáne saqtaý tehnologııalary buzylǵan jaǵdaıda mundaı ónimder taǵamnan ýlanýǵa, jiti ishek ınfektsııalaryna jáne parazıttik aýrýlarǵa sebep bolýy múmkin. Taǵamnan ýlaný men juqpaly aýrýlardyń aldyn alý úshin tutynýshylarǵa sýshı men rolldardy qaýipsizdik talaptaryn saqtaıtyn, resmı tirkelgen qoǵamdyq tamaqtaný jáne saýda nysandarynan ǵana satyp alý usynylady. Ónimderdi ruqsat etilmegen saýda oryndarynan jáne belgisiz satýshylardan satyp alýǵa bolmaıdy, — dep eskertti mamandar.
Aıtýynsha, ónimdi tańdaǵan kezde onyń saqtaý jaǵdaılaryna, syrtqy túri men ıisine nazar aýdarý qajet. Buzylý belgileri baıqalǵan sýshı men rolldardy tutynýǵa bolmaıdy.
Balalarǵa, júkti áıelderge, egde jastaǵy adamdarǵa jáne ımmýnıteti álsiregen adamdarǵa erekshe saqtyq tanytý usynylady, óıtkeni bul sanattaǵy adamdarda taǵamdyq ınfektsııalar densaýlyqqa neǵurlym aýyr zardaptar ákelýi múmkin.
Komıtet azamattardy taǵam qaýipsizdigi qaǵıdalaryn saqtaýǵa, sýshı men rolldardy satyp alatyn oryndardy tańdaýǵa jaýapkershilikpen qaraýǵa jáne óz densaýlyǵy men jaqyndarynyń densaýlyǵyn qorǵaý sharalaryn qabyldaýǵa shaqyrady.
Buǵan deıin Mańǵystaýda balyqtan ýlanǵan tórt adam jansaqtaý bólimine túskenin jazǵanbyz.
