Sý sharýashylyǵyna qajetti 757 tehnıka 39 mlrd teńgege satyp alynady
ASTANA. KAZINFORM — Bıyl sý sharýashylyǵyna qajetti 757 tehnıka 39 mlrd teńgege satyp alynady. Bul týraly Aqordada Sý resýrstary jáne ırrıgatsııa mınıstri Nurjan Nurjigitov aıtty.
— Sý sharýashylyǵy salasynyń materıaldyq-tehnıkalyq bazasyn nyǵaıtýǵa basa kóńil bólip otyrmyz. Bıyl 39 mlrd teńgege 757 tehnıka satyp alynady. Onyń 400-den astamy respýblıka boıynsha «Qazsýshar» mekemesine berildi. Árıne, biz Qazaqstannyń ońtústigine kóbirek tehnıka bólip jatyrmyz. Sebebi, aýyl sharýashylyǵynda sýdyń 97 paıyzy ońtústik óńirlerge beriledi, — dedi mınıstr sý sharýashylyǵy qyzmetkerlerin memlekettik nagradalarmen marapattaý rásimi aıasynda BAQ ókilderine bergen suhbatynda.
Sonymen qatar ol Sý resýrstary jáne ırrıgatsııa mınıstrligi qurylǵannan bergi 1,5 jyldyń ishinde sheshilgen máselelerge toqtaldy.
— Birinshiden, sý sharýashylyǵy salasy jaqsy mamandar kelýi úshin aılyqtaryn kóterdik. 2024 jyldyń mamyrynda «Qazsýshar» mekemesi qyzmetkerleriniń jalaqysyn 25 paıyzǵa, bıyl 1 shildeden ortasha eseppen 50 paıyzǵa kóterildi. Bul mekemedegi ortasha aılyq búginde 300 myń teńgeden asady. Ekinshiden mamandardyń kásibı deńgeıin kóterýge basa nazar aýdardyq. Ótken jyly «Qazsýshar» mekemesiniń 500 qyzmetkeri arnaıy kýrstan ótti. Oǵan bıýdjetten qarjy bólindi. Bıyl 1 myń adamdy arnaıy kýrstan ótkizbekpiz. Munan bólek, shet memleketterge mamandarymyzdy jiberý tájirıbesin bastadyq. Atap aıtqanda, Qytaıda bıyl 120 adam 2 aptalyq kýrstan ótedi. Bizdiń taraptan esh shyǵyn joq, bárin Qytaı taraby kóteredi. Bir adamǵa ortasha eseppen 7 myń dollar kóleminde. Búginde 60 mamanymyz oqýdan ótti. Qosymsha 60 maman jyl sońyna deıin ótedi. Bul jylda ótetin is-shara bolsyn dep qytaılyq áriptestermen kelissóz júrgizip jatyrmyz. Sonymen qatar 5 mamanymyz 1 aı boıy AQSh-ta bilim aldy. Mamandarymyz Ońtústik Koreıa, Japonııada bilimderin jetildirdi, — dedi Nurjan Nurjigitov.
Mınıstr sýdy durys bólý jumystary da óz nátıjesin bergenin aıtady.
— Osy jumystardyń arqasynda bıyl Balqash kóliniń deńgeıi 12 sm-ge kóterildi. 2 jyl qatarynan Qapshaǵaı sý qoımasyn 100 paıyz toltyrdy, — dedi ol.
Aıta keteıik, búgin Aqordada Memleket basshysy Qasym-Jomart Toqaev sý sharýashylyǵy qyzmetkerlerin memlekettik nagradalarmen marapattap, kásibı merekelerimen quttyqtady.