Sý sharýashylyǵy mamandarynyń jalaqysy taǵy 15% ósti
ASTANA. KAZINFORM — 2026 jylǵy 1 sáýirden bastap Qazaqstannyń sý sharýashylyǵy qyzmetkerleriniń eńbekaqysy taǵy 15%-ǵa artty. Byltyr «Qazsýshar» RMK qyzmetkerleriniń ortasha jalaqysy 50%-ǵa kóterilgen bolatyn.
Bul týraly Sý resýrstary jáne ırrıgatsııa vıtse-mınıstri Jandos Sálimov baıandady.
Vıtse-mınıstrdiń aıtýynsha, 2025 jyly «Tabıǵı monopolııalar týraly» Zańǵa sý sharýashylyǵy salasy qyzmetkerleriniń jalaqysyn 50%-ǵa deıin arttyrýdy kózdeıtin ózgerister engizildi.
Atalǵan ózgerister sýarý, aýyz sýmen jabdyqtaý jáne sý burý salalarynda qyzmet kórsetetin sý sektoryndaǵy 25 myńnan astam qyzmetkerdi qamtýǵa múmkindik berdi.
— Osy túzetýlerdiń nátıjesinde 2025 jylǵy 1 shildeden bastap «Qazsýshar» RMK qyzmetkerleriniń ortasha jalaqysy 50%-ǵa, ıaǵnı 203 myń teńgeden 326 myń teńgege deıin ósti. Bul rette eń tómengi jalaqy 2 eseden astamǵa — 85 myń teńgeden 185 myń teńgege deıin artty, — dedi J. Sálimov Ortalyq kommýnıkatsııalar qyzmetinde ótken baspasóz máslıhatynda.
Sonymen qatar, 2026 jylǵy 1 sáýirden bastap qyzmetkerlerdiń jalaqysy taǵy 15%-ǵa arttyryldy.
Atalǵan sharalar bilikti mamandardy tartýǵa, kadrlardyń turaqtamaýyn azaıtýǵa, qyzmetkerlerdiń kásibı deńgeıin arttyrýǵa baǵyttalǵan.
— Aldaǵy ýaqytta mınıstrlik sý sharýashylyǵy salasy qyzmetkerleriniń eńbekaqysyn elektr jáne jylý energetıkasy salalaryndaǵy eńbekaqy deńgeıimen teńestirý jumysyn jalǵastyrady, — dedi J. Sálimov.
Aıta keteıik, Qazaqstanda 2030 jylǵa deıin 42 jańa sý qoımasy salynady. Sondaı-aq 37 sý qoımasy men 110 gıdrotehnıkalyq qurylys qaıta jańǵyrtylyp, 14,5 myń shaqyrym kanal jóndeledi.
Sonymen birge, 142 aýyldyń sý ınfraqurylymy jańarady.