Sý salasyna qyzyǵýshylyq artyp keledi: óndiristik tájirıbeden ótken stýdentter sany ósti
ASTANA. KAZINFORM — Bıyl Sý resýrstary jáne ırrıgatsııa mınıstrliginiń ortalyq apparaty men «Qazsýshar» RMK fılıaldarynda joǵary oqý oryndary men kolledjderdiń 648 stýdenti óndiristik tájirıbeden ótedi.
Búgingi tańda olardyń 216-sy tájirıbeden ótip úlgerse, 394 stýdent qazir tájirıbeden ótip jatyr. Al taǵy 38 stýdent jyl sońyna deıin óndiristik tájirıbeden ótedi. Osylaısha, bıyl sý sharýashylyǵy salasynda óndiristik tájirıbeden ótetin stýdentter sany ótken jylmen salystyrǵanda eki esege jýyq kóbeıdi.
Eske salsaq, 2025 jyly kolledjder men joǵary oqý oryndarynyń 339 stýdenti tájirıbeden ótken bolsa, 2024 jyly bul kórsetkish 82 adam bolǵan.
Jambyl oblysyna jumys sapary kezinde Sý resýrstary jáne ırrıgatsııa mınıstri Nurjan Nurjigitov oblystaǵy «Qazsýshar» fılıalynyń nysandarynda óndiristik tájirıbeden ótip jatqan Qazaq ulttyq sý sharýashylyǵy jáne ırrıgatsııa ýnıversıteti stýdentterimen kezdesti. Bıyl osy fılıalda 215 stýdent tájirıbeden ótip jatyr. Kezdesýde stýdentter mınıstrge oqý úderisi týraly aıtyp, óńirdegi sý sharýashylyǵy nysandarynyń jumysymen tanysqannan keıingi áserlerimen bólisti.
— Búginde «Qazsýshardyń» fılıaldary elimizdiń barlyq óńirinde bar. Sondyqtan sý sharýashylyǵy mamandyǵynda oqıtyn stýdentter óndiristik tájirıbeden mindetti túrde osy fılıaldarda ótýi tıis. Aýdıtorııalarda sizder teorııany meńgeresizder, al munda sharýa qojalyqtarynyń sýmen qalaı qamtamasyz etiletinin óz kózderińizben kóresizder. Sonymen qatar mınıstrligimiz sý salasy qyzmetkerlerin áleýmettik qoldaý sharalaryn engizip keledi. Sońǵy 2,5 jylda «Qazsýshar» qyzmetkerleriniń jalaqysyn orta eseppen eki esege kóterdik. «Dıplommen — aýylǵa» baǵdarlamasy aıasynda turǵyn úı satyp alýǵa tómen paıyzdyq mólsherlememen jeńildetilgen nesıe qarastyrylǵan. Byltyr «Qazsýsharǵa» 48 túlek jumysqa qabyldandy. Birneshe jyldan keıin sizder de eńbek joldaryńyzdy bastaı alasyzdar. Memleket basshysy jastardyń Qazaqstannyń bolashaǵy ekenin únemi atap ótedi. Bizdiń barlyq jumysymyz aldaǵy jyldary sý salasyn sizderdiń alǵa jeteleýlerińizge jaǵdaı jasaýǵa baǵyttalǵan,— dedi Sý resýrstary jáne ırrıgatsııa mınıstri Nurjan Nurjigitov.
Budan buryn Sý sharýashylyǵy mamandyqtaryna 751 memlekettik grant bólingenin jazǵanbyz.
