Sý salasy jetkilikti deńgeıde tsıfrlandyrylmaǵan — vıtse-premer
ASTANA. KAZINFORM — Premer-mınıstrdiń orynbasary Qanat Bozymbaev sý salasyn tsıfrlandyrý máselesin kóterdi.
— Búginde el aýmaǵyndaǵy 42 sý qoımasyn salý nemese jańǵyrtý josparda bar. Sonymen qatar, birinshi kezekte 14,5 myń shaqyrym magıstraldi kanaldarǵa kúrdeli jóndeý júrgizilip jatyr. Memleket basshysynyń óte qatań talaby bar — sý shyǵynyn azaıtý kerek. Ol úshin biz salany tsıfrlandyrýymyz qajet. Ókinishke qaraı, búginde tsıfrlyq tehnologııaǵa jetýimiz áli de alys, biraq biz bul baǵytta jumys istep jatyrmyz. Sý shyǵynyn naqty ýaqytta kórip otyrýymyz kerek, — dedi Qanat Bozymbaev Úkimet úıinde ótken baspasóz máslıhatynda.
Buǵan deıin vıtse-premer bıyl elimizde 105 gıdrotehnıkalyq qurylysqa tekserý júrgiziletinin aıtty.
Sondaı-aq Qanat Bozymbaev artta qalǵan óńirlerdi respýblıkalyq bıýdjetten qarjylandyrýǵa basymdyq beriletinin aıtyp otyr.