Sýrrogat ananyń qyzmetin zańdy nekedegi erli-zaıyptylar ǵana paıdalana alady
ASTANA. KAZINFORM – Memleket basshysy «Neke (erli-zaıyptylyq) jáne otbasy týraly» kodekske ózgerister men tolyqtyrýlar engizý týraly zańǵa qol qoıdy. Endi sýrrogat ana qyzmetin tek nekede (erli-zaıyptylyqta) turǵan Qazaqstan Respýblıkasynyń azamattary ǵana paıdalana alady.
Zańǵa sáıkes, sýrrogat anamen shart jasasatyn erli-zaıyptylar:
· sýrrogat ananyń medıtsınalyq tekserýden ótýine ketetin shyǵyndardy tóleıdi;
· qosalqy reprodýktıvtik ádister men tehnologııalardy qoldanýǵa jumsalatyn shyǵyndardy óteıdi;
· reprodýktıvtik tehnologııalardy qoldanatyn medıtsınalyq uıymǵa ózderiniń dene jáne psıhıkalyq saýlyǵy týraly medıtsınalyq qorytyndyny, sondaı-aq medıtsınalyq-genetıkalyq tekserý nátıjelerin usynady;
· sýrrogat ananyń júktilik, bosaný jáne bosanǵannan keıingi 56 kún ishindegi medıtsınalyq qyzmet kórsetý shyǵyndaryn óteıdi. Eger júktilikke nemese bosanýǵa baılanysty asqynýlar bolsa, bul shyǵyndar bosanǵannan keıingi 70 kúnge deıin tólenedi.
Aıta keteıik, buǵan deıin Memleket basshysy «Topyraqty qorǵaý týraly» zańǵa da qol qoıǵan edi.
