Sýrrogat ana qyzmetine júgingen erli-zaıyptylardyń mindeti qandaı
ASTANA. KAZINFORM – Densaýlyq saqtaý mınıstrligi sýrrogat ana qyzmetine júgingen erli-zaıyptylardyń mindetin atady.
«Qazaqstanda sýrrogat ana qyzmetterin júrgizý baǵdarlamasy men erejeleri zańnamamen rettelgen. Sýrrogat ana bolý qosalqy reprodýktıvti tehnologııalar ádisteriniń biri retinde «Halyq densaýlyǵy jáne densaýlyq saqtaý júıesi týraly» Qazaqstan Respýblıkasynyń kodeksimen jáne «Neke (erli-zaıyptylyq) jáne otbasy týraly» kodekspen (budan ári – Kodeks) retteledi. Kodekstiń 9-taraýy, 54-babynyń, 1-tarmaǵyna sáıkes, sýrrogat ana qyzmetterin qoldanýdyń negizgi erejeleri, talaptary men sharttary kórsetilgen. Oǵan sáıkes sýrrogat ana bolý sharty Qazaqstan Respýblıkasynyń azamattyq zańnamasynyń talaptary saqtala otyryp, jazbasha nysanda jasalady jáne mindetti túrde notarıatta kýálandyrýǵa jatady», - dep atap ótti mınıstrlikten agenttiktiń resmı saýalyna oraı.
Vedomstvonyń málimetinshe, qorytyndynyń bir danasy notarıatta kýálandyrylǵan sýrrogat ana bolý shartyna qosa beriledi jáne mámileniń jasalǵan jeri boıynsha saqtalady (56-baptyń 3-tarmaǵy). Eger sýrrogat ana tirkelgen nekede turǵan (erli-zaıypty bolǵan) jaǵdaıda, sýrrogat ana bolý shartyn jasasý kezinde jubaıynyń notarıat tártibimen kýálandyrylýǵa tıis jazbasha kelisimi usynylýy qajet (56-baptyń 2-tarmaǵy). Erli-zaıyptylar men sýrrogat ana arasyndaǵy notarıaldy tirkelgen shart negizinde ǵana densaýlyq saqtaý sýbektileri «Qosalqy reprodýktıvti tehnologııalar» (sýrrogat ana) baǵdarlamasy boıynsha qyzmet kórsetedi. Sýrrogat ana qyzmetterin alý úshin azamattar shartty resimdegennen keıin qosalqy reprodýktıvti tehnologııalar ádisterimen bedeýlikti emdeýmen aınalysatyn medıtsınalyq uıymdarǵa derbes júginedi.
«Sýrrogat ana bolý shartyn medıtsınalyq uıymdardyń mamandary jasamaıdy. Tıisinshe medıtsına qyzmetkerleri sharttyń mazmuny men talaptary, onyń ishinde eki taraptyń quqyqtary men mindetteri úshin jaýapty bolmaıdy. Sonymen qatar sýrrogat ana salasynda qosymsha qyzmetter kórsetýdi júzege asyratyn agenttikterdiń qyzmeti medıtsınalyq qyzmetterge jatpaıdy jáne tıisinshe Densaýlyq saqtaý mınıstrliginiń quzyretine kirmeıdi», - delingen jaýapta.
Mınıstrliktiń dereginshe, «Neke (erli-zaıyptylyq) jáne otbasy týraly» kodekstiń 57-baby 1-tarmaǵyna sáıkes, sýrrogat ana bolý shartyn jasasý kezinde erli-zaıyptylar (tapsyrys berýshiler):
1) sýrrogat ananyń medıtsınalyq zerttep-qaraýdan ótýimen baılanysty materıaldyq shyǵystardy kóterýge;
2) qosalqy reprodýktıvtik ádister men tehnologııalar qoldanylýyna baılanysty materıaldyq shyǵystardy kóterýge;
3) qosalqy reprodýktıvtik ádister men tehnologııalardy qoldanatyn medıtsınalyq uıymǵa tán saýlyǵy, psıhıkalyq densaýlyǵy týraly medıtsınalyq qorytyndyny, sondaı-aq medıtsınalyq-genetıkalyq zerttep-qaraýdyń nátıjelerin usynýǵa;
4) sýrrogat ananyń júktiligi, bosanýy kezeńinde jáne bosanǵannan keıin 56 kún ishinde medıtsınalyq qyzmet kórsetý boıynsha shyǵystardy tóleýge, al júktilikpen jáne bosanýmen baılanysty asqyný bolǵan jaǵdaıda, 70 kún ishinde shyǵystardy tóleýge mindetti.
