Sýretshilerdiń basty problemasy - turaqty túrde memlekettik dárejede uıymdastyrylatyn konkýrs joq
ASTANA. 7 qarasha. QazAqparat - Bul týraly búgin Astanada «Nur Otan» partııasynyń janynan qurylǵan «Mıras» mádenıet pen ónerdi damytý máseleleri boıynsha qoǵamdyq keńesiniń kezekti jetinshi otyrysynda Qazaqstan Respýblıkasy Sýretshiler odaǵynyń tóraǵasy Baıtursyn Ómirbekov aıtty.
«Basty problema - bizde turaqty túrde memlekettik dárejede uıymdastyrylatyn konkýrs joq. Áriptesterimiz renjimes, basqa óner salalaryn qarastyrsaq, mýzykada skrıpkasy bar, vokaly bar, taǵy basqalary bar birneshe memlekettik dárejedegi konkýrstary bar. Kıno salasyn alsaq, ózderińiz bilesizder, túrli festıvalder bar. Ádebıette poezııa, dramatýrgııa jáne basqa salalar úshin ótkizilip jatqan konkýrstar óte kóp. Al jas sýretshilerge arnalǵan «Shabyt» degen bir ǵana konkýrs bar», - deıdi B. Ómirbekov.
«Basqa elderge barsańyz aldymen Lývrǵa nemese Ermıtajǵa barasyz. Al Almatydaǵy Qasteev murajaıyna barsańyz, sońǵy on jylda satyp alynǵan úlken, jaqsy shyǵarma joq. Sebebi ondaı shyǵarma óz betimen jasalmaıdy. Ondaı shyǵarma memlekettik tapsyryspen jasalady. Mysaly ótkende Qyrǵyzstanda Prezıdentimizdiń resmı saparyna oraı bizge kórme jasańdar dedi. Sonda Astana týraly, jeltoqsan oqıǵasy týraly kartınalar bolsa ala kelińizder deıdi. Al ondaı týyndylar bizde joq. Sebebi memleketten tapsyrys bolmasa, sýretshi ondaı sýretterdi óz betimen salmaıdy. Óıtkeni ony eshkim satyp almaıdy. Sonda sýretshi qalaı kún kórý kerek?! Sondyqtan olar Arbatqa qoısa, suranysqa ıe bolatyn ádemi aqboz attyń sýretin, bolmasa jaqsy tabıǵatty salady. Olardy halyq satyp alady. Mine, ónerdiń máni osylaı tómendep bara jatyr», - deıdi Sýretshiler odaǵynyń tóraǵasy jýrnalısterge bergen suhbatynda.
Otyrysta sondaı-aq, Mańǵystaý oblysy ákiminiń orynbasary Halıla Nurǵalıevanyń «Aýyldaǵy mádenıet obektilerin damytýdyń hal-ahýaly» taqyrybyndaǵy baıandamasy tyńdaldy.
