Sýretshiler úı qabyrǵasyna koronavırýspen kúresti beıneledi: Dárigerge bas ıemiz
ALMATY. QazAqparat – Almatyda kópqabatty úıdiń qabyrǵasynda koronavırýspen kúresip jatqan medıtsına qyzmetkerleriniń beınesi paıda boldy, dep habarlaıdy QazAqparat tilshisi.
Almaty qalasy ákimdiginiń baspasóz qyzmetiniń basshysy Áset Muqajanovtyń habarlaýynsha , mýral Qurmanǵazy Sháripov kósheleri qıylysyndaǵy úıdiń qabyrǵasyna salyndy.
«Qalamyzdyń jas sýretshileri qaýipti indetpen kúresip júrgen bizdiń dárigerlerge arnap mýral saldy. Kún saıyn medıtsına qyzmetkerleri óz bastaryn qaterge tigip, COVID-19-ǵa qarsy is-qımylda aldyńǵy shepte eńbek etip júr. Qaýipti indettiń beti qaıtyp, ómirimiz qalypty arnaǵa túskende, osy mýralǵa qarap, aq halatty abzal jandardy rızashylyqpen eske alamyz. Dárigerlerge bas ıemiz! #AlmatyBirgemiz», - dedi Áset Muqajanov.
