Sýretshi Tımýr Daıyrbaev balalar úıiniń tárbıelenýshilerine sheberlik sabaǵyn ótkizdi
ASTANA. QazAqparat - Astanadaǵy QR Ulttyq mýzeıinde brıtandyq professor Geıvın Kretchmar men Alper Akdenızdiń «Qazaqtyń rýhy» atty jeke kórmesi ashyldy, dep habarlaıdy QazAqparat.
Astana Finance Days halyqaralyq qarjy konferentsııasyna oraı arnaıy uıymdastyrylǵan kórme aıasynda kartına avtory Tımýr Daıyrbaev qazaqstandyq balalar úıiniń tárbıelenýshilerine sheberlik sabaǵyn ótkizdi.
«Búgin men birinshi ret sheberlik sabaǵymdy ótkizdim. Men úshin eń bastysy jumys úderisi. Balalardyń áleýeti bar, olardyń ómiri men bolashaǵy áli alda. Barlyq balanyń qabileti birden baıqalady. Óz basym búgin balalarǵa sulýlyqtyń syry men ómirde óner arqyly beriletin talaı jaqsy dúnıeniń baryn túsindirýge tyrystym», - dedi T.Daıyrbaev.
Qylqalam sheberiniń aıtýynsha, bul kartınalardy salýǵa úsh jyl ýaqyt ketken.
«Bul kollektsııany salýǵa úsh jyl boıy eńbek ettim. Aldaǵy ýaqytta kollektsııany jalǵastyrýdy josparlap otyrmyn. Jańa tyń dúnıe jasasam deımin. Qazirdiń ózinde bolashaq kartınalardyń qandaı bolatynyn tutas kórip otyrmyn, keıbireýi ýaqyt talabyna saı ózgertilýi múmkin», - dedi ol.
Buǵan qosa, kartına avtory «Qazaqtyń rýhy» kórmesine qoıylǵan týyndylarynyń ishindegi eń súıikti kartınalaryn atap berdi.
«Qazaqtyń rýhy» dep aty aıtyp turǵandaı, birinshi týyndy men úshin qymbat. Sebebi, ol qazaq halqynyń erkindigi men ulylyǵyn pash etip turǵandaı kórinedi. Sondaı-aq kartınalardan qazaq handyǵynyń qurylý kezeńin kórýge bolady. Bunyń barlyǵy tarıhı shyndyq. Jalpy, kórmede usynylǵan karınalarymnyń barlyǵy men úshin qymbat. Tipti, olar baǵasyz desem bolady. Óıtkeni, men úshin balam sekildi. Onyń baǵasyn aqshamen ólsheý múmkin emes», - dedi Tımýr Daıyrbaev.
Belgili sýretshiniń sheberlik sabaǵyna Qazaqstannyń ár aýmaǵynan kelgen 30 bala qatysty. Olar - ata-ananyń qaraýysyz qalyp, balalar úıinde tárbıelenip jatqan jasóspirimder.
«Búgingi sharaǵa Óskemen, Taldyqorǵan, Oral jáne t.b. óńirlerden kelgen jetkinshekter qatysýda. Bul balalar kúni keshe ǵana elordada alǵash ret ótkizilgen respýblıkalyq daryndy balalar konkýrsyna qatysyp júldege ıe boldy. Balalardyń barlyǵy shyǵarmashylyqpen aınalysatyn, daryndy balalar: sýret salyp, án aıtyp, bımen aınalysady. Elordadan shalǵaı jatqan óńirlerdiń balalarynyń osyndaı sheberlik sabaǵyna qatysyp, belgili sýretshiden úırenýi eleýli oqıǵa dep oılaımyn. Bolashaqta bul úrdis jalǵasyn taýyp, mádenı yntymaqtastyǵymyz nyǵaıa túsedi dep úmittenemin», - dedi mýzykalyq prodıýser Baqytjan Tajınov.
Belgili sýretshiniń sheberlik sabaǵyna qatysqan balalar da qýanyshtaryn jasyra almady.
«Men sýret sala alamyn. Al kásibı sýretshiniń sheberlik sabaǵyna qatysqanyma jáne sýret óneriniń qyr-syryn úırengenime qýanyshtymyn. Men Astanaǵa respýblıkalyq konkýrsqa qatysý úshin kelip ekinshi orynǵa ıe boldym. Búgin mynadaı keremet kórmege tap bolyp, belgili sýretshimen kezdestim», - dedi Shyǵys Qazaqstan oblysynan kelgen Ravıl Fomın.
Al Ekibastuz qalasyndaǵy «Úmit» balalar úıinen kelgen ıÝlııa Sımenchenko sheberlik sabaǵynan alǵan áserin bylaı sıpattady:
«Men Astanaǵa alǵash keldim. Keshe respýblıkalyq konkýrsqa qatysyp edim, búgin sheberlik sabaǵyna tap boldym. Meniń sýret ónerine degen qyzýyǵýshylyǵym zor. Onyń ústine óner maıtalmanynan dáris aldyq. Buǵan deıin Tımýr Daıyrbaevty bilmegen edim, endi onyń shyǵarmashylyǵyn únemi baqylap júretin bolamyn».
