Sýretshi murajaıdaǵy 1 mln. dollar turatyn qumyrany ádeıilep syndyrdy
ASTANA. QazAqparat - AQSh-tyń Maıamı qalasyndaǵy (Florıda shtaty) Horhe Peres atyndaǵy óner murajaıyna kelýshi adam belgili qytaılyq sýretshi-dıssıdent Aı Veıveıdiń quny 1 mln dollarǵa baǵalanǵan qumyrasyn syndyryp tastaǵan.
Amerıkalyq aqparat quraldarynyń habarlaýynsha, 51 jastaǵy jergilikti sýretshi Maksımo Kamınero áınekpen qorǵalmaǵan birneshe qumyra turǵan zalǵa kirgen de, solardyń bireýin qolyna alǵan. Kúzetshiler qumyrany ornyna qoıýdy ótingen kezde, ol kerisinshe qundy jádigerdi bar kúshimen edenge urǵan.
Kamıneronyń aıtýynsha, bul onyń murajaıda tek sheteldik sýretshilerdiń jumystary qoıylatyndyǵy úshin jasaǵan qarsylyǵy. Basqa eshteńege túsinik berýden bas tartqan ol, búgin arnaıy baspasóz-máslıhatyn uıymdastyratynyn aıtqan.
Kamıneroǵa 1 mln dollar shyǵyn keltirgeni úshin aıyp taǵyldy, oǵan 5 jylǵa deıin bas bostandyǵynan aıyrylý qaýpi tónip tur.
Syndyrylǵan jádiger ótken jyldyń sońynda ashylǵan Aı Veıveıdiń 16 ejelgi qumyradan quralǵan kórmesindegi qundy jádigerlerdiń biri bolǵan. Sýretshi ejelgi qumyralardy jańa boıaýlarmen árlendirip, ózindik stılin qosyp, túrlendirip shyǵarǵan bolatyn. Murajaı qyzmetkerleriniń aıtýynsha, bul jádigerlerge shamamen 2 myń jyl bolǵan. Olar Qytaıda Han dınastııasy bılik júrgizip turǵan kezde (b.d.d 206 - b. d. 220 jj.) jasalǵan. Qumyralar qoıylǵan qabyrǵaǵa Aı Veıveıdiń ózi de osyndaı qumyralardy kúl-talqan qylyp syndyryp jatqan sýretter ilingen eken.
Aıta keteıik, Aı Veıveı tek sýretshi ǵana emes, sonymen qatar, belgili quqyq qorǵaýshy retinde de tanymal. 2011 jyly ol salyq tóleýden jaltardy degen aıyppen 3 aı boıy túrmede jatqan. Alaıda óziniń aıtýynsha, ol qytaı bıligin synaǵany úshin tutqyndalǵan.
Sýretshi burynnan beri óz shyǵarmashylyǵynda qumyralar men basqa da ejelgi jádigerlerdi qoldanady.
