Sýretshi-ıllıýstrator Kerrı Nıýmaıer ónerge baýlýdyń amerıkandyq úlgisin kórsetti
ASTANA. QazAqparat - Sýretshi-ıllıýstrator Kerrı Nıýmaıer - Amerıkanyń Kentýkkı shtatyna keńinen tanymal jan-jaqty óner ıesi. Taıaýda ol Almaty men Astana qalalarynda bolyp, qazaqstandyq balalarǵa arnap sheberlik synyptaryn ótkizdi.
Olardy aınaladaǵy sulýlyq pen kórkemdikti kóre bilýge, sony qaǵazǵa túsirýge baýlydy.
Kerrı halyqtyń ártúrli toptaryna arnalǵan óner salasyndaǵy aǵartýshylyq jobalardy júrgizedi. 2002 jyly Tsıntsınnatıdegi sýret Akademııasyn támamdap, bakalavr dárejesin ıemdengen. Sosyn Lýısvıll ýnıversıtetinen óner magıstri dárejesin alyp shyqty. 8 jyldan beri memlekettik mektepterde sabaq berip keledi. Onyń oqýshylary kóptegen óner báıgelerinde oq boıy ozyq shyǵyp, úzdik atanǵan. Búginde ol Lýısvıll ýnıversıtetine qarasty bilim jáne adamdyq damý kolledjinde ustazdyq etedi. Odan ózge Kentýkkı shtatyndaǵy mektepterde dáris beredi. Jastar arasynda kóshbasshylyq, saýattylyq, erkin oı men tarıh taqyrybynda túrli qoǵamdyq jobalardy júzege asyrǵan belsendi tulǵa. Jýrnaldarǵa ıllıýstratsııa jasaıtyn, rok-mýzyka jazatyn jáne oryndaıtyn óneri de bar. Ol úsh kúndik Lýısvıll mýzyka festıvaliniń qosalqy avtory. Oǵan búkil Amerıka shtattarynan ánshi qyzdar kelip qatysady. 10-18 jas aralyǵyndaǵy qyzdarǵa mýzykadan semınarlar ótkizip, aspapta oınaýdy úıretedi.
Qazaqstanda da Kerrı óner qudiretin balalardyń júregine jetkizý maqsatynda birneshe is-sharalar ótkizdi. Áýeli Almatyda 10 kún boıy ARTBATFEST-6 festıvaline qatysty. Bul shara AQSh-tyń Qazaqstandaǵy elshilik mıssııasynyń qoldaýymen iske asyryldy. Sondaı-aq, Ábilhan Qasteev atyndaǵy Óner mektebiniń oqýshylarymen birge «Er Tóstik» ertegisiniń jelisimen panno jasap shyqty.
Kerrı Astanada da qarap jatpady. Bilekti túrip tastap «Zamandas» aýla klýbynyń balalaryna plenkadan skýlptýralyq týyndylar jasaý jóninde sheberlik synyptaryn ótkizdi. Oǵan klýb balalary dán rıza boldy. Keı ata-analardyń balalaryn óner mektebinde oqytýǵa múmkindigi joq. Ondaı balalar úıiniń mańyndaǵy aýla klýbtarynda ónerin shyńdaýǵa, damytýǵa tyrysady. Sondyqtan bul «Zamandas» klýbynyń jetkinshekteri úshin úlken múmkindik edi.
Sýretshiniń balalarmen birlese jasaǵan týyndylary 4 qyrkúıek kúni elordadaǵy Nurjol býlvarynda kórermen nazaryna usynyldy. "Art bombing" dep atalǵan bul kórmeniń maqsaty - astanalyqtar nazaryn balalar shyǵarmashylyǵyna aýdarý jáne qalanyń kreatıvti ımıdjin jasaý edi. Flesh-mob óz maqsatyna jetti deýge ábden bolady. Óıtkeni, erekshe is-sharany tamashalaýshylar qarasy kóp boldy jáne olar óner týyndylaryn joǵary baǵalady, jumys avtorlarymen áńgime-dúken qurýǵa qyzyǵýshylyq tanytty. Kerrı sondaı-aq osy klýb balalarynyń basyn qosyp, jańa Amerıkalyq buryshqa freska jasap shyqty.
«SOS balalar aýylynyń» tárbıelenýshilerimen ótken shyǵarmashylyq kezdesý de óz deńgeıinde, óte qyzyqty ótti. Sýretshi-pedagog qala mańyndaǵy mektep oqýshylarynyń tynys-tirshiligimen tanysýdy da umytpady.
Bizdiń talantty balalar Kerrı Nıýmaıerdiń bala janyna izgilik dánin egip, ónermen sýsyndatýdy ómirlik maqsat etken pedagog, ónertanýshy ekendigine kóz jetkizdi. Ol qazaqstandyqtar arasynda da ónerge degen qyzyǵýshylyq pen mahabbatty oıatyp, óz maqsatyna jetti degen oıdamyz. Amerıkalyq qonaq ásirese balalarymyzdyń sýret salýǵa degen qushtarlyǵyn erekshe baǵalady.
«Ár bala talantty. Ár balanyń qııaly men ómirdi kórýde ózindik kózqarasy bar. Men sýret salý qolynan kelmeıtin bala joq dep oılaımyn. Ol qabilet barlyǵymyzda bar. Tek sony kóre bilý kerek. Balaǵa jastaıynan onyń qabileti bar ekenin, bári qolynan keletinin sanasyna sińirip ósirý kerek. Men qazaq balalarynyń ár nárseni bilýge qushtar izdenimpaz ári óte sabyrly ekendigin baıqadym. Ómirimde birinshi ret aǵylshynsha bilmeıtin shákirttermen jumys istedim. Biraq ónerdiń óz tili bar, sondyqtan til tabysý qıyn bolǵan joq» deıdi Kerrı Nıýmaıer. Janat Qapalbaeva
