Sýretshi B. Ásemqul jas balalarǵa sheberlik synybyn ótkizdi
ASTANA. 2 maýsym. QazAqparat /Saltanat Qumabekova/ - Búgin Astanada QR Tuńǵysh Prezıdenti murajaıynda «Úkili úmit» jobasy aıasynda «Óner álemine samǵaý» atty kórme ótti.
Halyqaralyq balalardy qorǵaý kúnine oraı uıymdastyrylǵan bul kórmege №1 Óner mektebiniń 5-synyp oqýshylary qatysty. Olarǵa XIII Halyqaralyq «Shabyt» shyǵarmashyl jastar festıvaliniń bas júldegeri, jas sýretshiler odaǵynyń múshesi Beıbit Ásemquldyń týyndylary kórsetilip, sýretshi jas balalarǵa sheberlik synybyn ótkizdi. Ol óziniń oqý barysynda jáne shyǵarmashylyqpen aınalysý sátinde jetken jetistikterimen, tájirıbesimen bólisti. Sondaı-aq, sýretshi Beıbit Ásemqul jas sýretshilermen maıly boıaýdyń jaǵystary men tústiń qoldanýyn, kompozıtsııanyń sheshimin jumys barysynda túsindirip, ózine málim qyr-syrymen bólisti. Kórmeni mýzeıge kelýshiler men óner súıer qaýym tamashalaı aldy.
«Búgingi is-shara daryndy jastarymyzdy qoldaý maqsatynda uıymdastyryldy. Elimizde jas daryndarymyz kóp. Biraq, olarǵa qoldaý kórsetip, demeý jasamasa, talantyn syrtqa shyǵarý qıyndaý bolady. Sondyqtan da, jas sýretshilerimizdi qoldaý maqsatynda «Úkili úmit» jobasyn qolǵa aldyq. Alǵashqy kezdesýdi Beıbit Ásemquldyń kórmesinen bastadyq. Jas avtorlarymyz kórmeden jaqsy áser alyp, shabyttanyp qaıtady degen oıdamyn. Jobamyzdyń búgingi bastamasy jaqsy nátıje berse, onda ony jylda dástúrli túrde uıymdastyryp otyramyz», - deıdi QR Tuńǵysh Prezıdent Mýzeıi dırektorynyń orynbasary Kúláısha Aqtaeva.
