Sýret ónerinde jańa tehnıka oılap tapqan álemge áıgili qylqalam sheberi Rene Reza Astanada jeke kórmesin ashty
ASTANA. 25 qazan. QazAqparat - Astanada medıtsınalyq shprıtstarmen sýret salyp, álemge aty shyqqan reseılik sýretshi Igor Rıazantsevtiń (laqap aty Rene Reza) jeke kórmesi ashyldy.
Rene Reza ózi ómirge ákelgen jańa tehnıkany - «fılýmızm» (latyn tilinen «filum» - jip, talshyq degen sózinen) dep ataǵan jáne sol arqyly jańa zaman óneriniń tarıhyna atyn máńgi qaldyrdy. Tehnıkanyń biregeıligi sol, sýret qylqalammen emes, akrıl boıalaryn ıneden qysyp shyǵarý arqyly kenepke túsiriledi. Osylaısha jipterge uqsas túster tutas beıne jasap shyǵady.
Álemde teńdesi joq ózindik sýret salý mashyǵyn oılap tapqan óner ıesi atalmysh stıl túrin patenttep úlgergen jáne Halyqaralyq «Gınnes» rekordtar kitabiniń nomınanty atanyp otyr. Qazir Rene Reza bul baǵytpen eki jyldan astam ýaqyt aınalysyp júr. Ineden kórkem beıne salyp, búkil dúnıeni eleń etkizgen sýretshi óziniń jeke mektebin ashýǵa áli asyqpaıdy. Sebebi bunyń biregeıligin, qupııa-syryn ázirge ózinde ǵana saqtaǵysy keledi.
«Men bar ǵumyrym boıy eshkimge uqsamaıtyn, balamasy joq óz stılimdi tabýdy arman etip keldim, úzdiksiz izdeniste boldym. 9 jasymda men kórkemsýretpen aınalysa bastadym, endi mine 45 jasymda osyndaı jańa stıl oılap taptym. Men ózimdi akademııalyq sýretshilerdiń qataryna qospaımyn, negizinen jańa zaman ónerine úles qosyp júrgen adammyn. Meniń kartınalarymnyń sıýjeti - jas boıjetkenniń obrazy. Bul sıýjetti bizdiń ómirimizge allegorııa retinde alamyn, ǵumyrymyz jastyq shaq sekildi qylyshtyń sabyndaı ǵana qysqa ekendigin eske salyp otyrǵym keledi», - deıdi sýretshi jýrnalıstermen bolǵan avtorlyq kezdesýde.
Ol Astanaǵa eń úzdik degen sýretterin alyp keldi. Sonyń ishinde eń tanymaly altynmen aptalyp, ústinen ıne boıaýlarymen salynǵan týyndy - Grıgorıı Raspýtınniń portreti. Sonymen qatar bizdiń elimizge jasaǵan sapary barysynda ol fılýmızm boıynsha sheberlik synyptaryn ótkizip, óziniń stılin balalarǵa úıretpek.
Onyń aıtýynsha, bul qylqalam sheberiniń shetelge jasaǵan tuńǵysh sapary. Óıtkeni ekspozıtsııalyq jumyspen bir jyldan astam ýaqyt qana aınalysyp keledi. Astanadan keıin ol AQSh-qa, keıin Chehııaǵa barýdy josparlap otyr.
