Sý resýrstary mınıstrligi sýdyń «qara naryǵyn» joıý is-sharalary josparyn ázirleýi tıis — Bozymbaev
ASTANA. KAZINFORM — 2026 jylǵy 1 naýryzǵa deıin ylǵalsúıgish daqyldardyń egistik qurylymyn bekitilgen sý lımıtterine sáıkes túzetý qajet. Bul týraly búgin Úkimet otyrysynda Premer-mınıstrdiń orynbasary Qanat Bozymbaev aıtty.
— Aýyl sharýashylyǵy mınıstrligi Sý resýrstary jáne ırrıgatsııa mınıstrligimen, oblys ákimdikterimen birge jumys tobyn quryp, eki apta merzimde sý paıdalaný lımıtterin aıqyndaý jáne boljamdy sý kelý kólemin eskere otyryp, aldaǵy vegetatsııalyq kezeńge aýyl sharýashylyǵy daqyldaryn ornalastyrý josparyn bekitý qajet. Sonymen qatar, Ortalyq Azııada aýa raıy ózgergen jaǵdaıda Sý resýrstary jáne ırrıgatsııa mınıstrligi 2026 jylǵy 1 aqpanǵa deıin Aýyl sharýashylyǵy mınıstrligine barlyq oblys boıynsha sý kelýiniń eń pessımıstik stsenarııin eskere otyryp, sý tutynýdyń naqtylanǵan lımıtterin usynýy tıis. Óz kezeginde Aýyl sharýashylyǵy mınıstrligi 2026 jylǵy 1 naýryzǵa deıin ylǵalsúıgish daqyldardyń egistik qurylymyn bekitilgen sý lımıtterine sáıkes túzetýi kerek, — dedi vıtse-premer.
Onyń aıtýynsha, oblys ákimdikteri vegetatsııa bastalǵanǵa deıin agrarshylar arasynda ylǵalsúıgish daqyldardy qysqartý jáne sýdy az qajet etetin daqyldarǵa kóshý qajettigi týraly maqsatty túsindirý jumystaryn júrgizýi, sondaı-aq mınıstrlikter men ǵylymı ınstıtýttarmen birlesip, ınnovatsııalyq ylǵal ustap qalatyn preparattardy synaqtan ótkizý úshin ár oblysta keminde 100 gektar aýmaqty anyqtap, qarjylandyrýdy jergilikti bıýdjetten qamtamasyz etýi tıis.
— Sonymen qatar, «Qazsýshar» RMK sýarý sýyn jetkizý týraly kelisimsharttardy ylǵalsúıgish daqyldar boıynsha tek bekitilgen lımıtter sheginde ǵana jasaıtyn bolady. Budan bólek, Sý resýrstary jáne ırrıgatsııa mınıstrligine 2026 jylǵy 1 aqpanǵa deıin quqyq qorǵaý organdarymen birlesip, 2026 jyly sýdyń «qara naryǵyn» joıý jónindegi naqty is-sharalar josparyn Úkimet Apparatyna engizý tapsyryldy, — dedi Qanat Bozymbaev.
Aıta keteıik, mınıstrler kabınetiniń músheleri elimizdiń kólik-tranzıt salasyn damytý men tsıfrlandyrý máselesin talqyǵa salyp jatyr.