Sýrdodzıýdoshy: Ár júlde – kópjyldyq eńbektiń jemisi
ORAL. KAZINFORM – Batysqazaqstandyq sýrdodzıýdoshy, Qazaqstannyń eńbek sińirgen sport sheberi Anastasııa Tımoshenkova úshin ásirese, ótken jyl jemisti boldy. Tokıo qalasynda ótken XXV jazǵy Sýrdlımpıada oıyndarynda áıelder arasyndaǵy komandalyq saıysta el quramasy sapynda kúmis júldeger atanǵan sportshy óziniń tabys-jetistikteri týraly áńgimelep berdi.
- Anastasııa Vladımırovna, sýrdodzıýdoǵa birden keldiń be, aldymen soǵan toqtalsań?
- Sportpen 2018 jyldan bastap etene aınalystym. Áýeli jeńil atletıkaǵa den qoıyp, respýblıkalyq deńgeıde jaqsy nátıjelerge qol jetkizdim. Jeńimpaz atandym, júldegerler qatarynan kórindim. Keıin 2022 jyly ózimdi sýrdodzıýdoda baıqap kórýge bel baıladym. Bul sport túrine meniń áleýetimdi baıqaǵan jattyqtyrýshylar ákeldi.
Meniń bas bapkerim – Temirjan Hasanǵalıev. Temirjan Sultanulynyń basshylyǵymen tehnıkamdy jetildirip, minez, sheberligimdi shyńdap, iri halyqaralyq jarystarǵa daıyndalyp kelemin.
- Endeshe, sýrdodzıýdo nesimen qyzyqtyrady?
- Sýrdodzıýdo óziniń ereksheligimen, tereńdigimen tartady. Bul – tek kúsh pen dene daıyndyǵy ǵana emes, sonymen qatar taktıka, áreket etip, qarsylasyńdy sezine bilý. Bul sport túri tózimdilikke, tártipke jáne jaýapkershilikke úıretedi. Men úshin dzıýdo – turaqty ósý joly dep bilemin.
- Sporttyq jolyńda biraz bıiktikti baǵyndyryp úlgergen bolarsyń?
- Men sýrdodzıýdodan eńbek sińirgen sport sheberimin. Qazaqstandaǵy dodalardy aıtpaı-aq qoıaıyn. 2023 jyly Qyrǵyzstan astanasy Bishkek qalasynda ótken Azııa – Tynyq muhıt birinshiliginde 63 kelige deıingi salmaqta qola júldeger atandym. Keıin Malaızııa astanasy Kýala-Lýmpýrda Azııa – Tynyq muhıt oıyndarynda jekeleı jáne komandalyq esepte ekinshi orynnan kórindim. Túrkistan qalasynda álem chempıonatynda úzdik úshtikke iliktim.
Eń basty tabysym – 2025 jyly Tokıo Sýrdlımpıada oıyndarynda komandalyq esepte kúmis júldemen marapattaldym.
Ár júlde – kópjyldyq eńbektiń jemisi, oqý-jattyǵý jıyndarynyń, bapker men komanda qoldaýynyń nátıjesi.
- Tokıo Sýrdlımpıada oıyndary jóninde tolyǵyraq aıtyp berseń?
- Sýrdlımpıada oıyndary – estý qabileti buzylǵan sportshylar arasynda álemde eń joǵary deńgeıdegi jarys. Básekelestik óte myqty boldy, ár beldesý bar zeıinińdi salyp, kúshińdi sarqyp jumsaýdy qajet etti.
Komandalyq kúmis men úshin úlken maqtanyshqa aınaldy, bul bizdiń jaýapkershiligimizdi tanytty. Biz bir-birimizdi qoldap, aıaǵyna deıin kúrestik, sonyń arqasynda jeńiske jetip, el úmitin aqtaı bildik.
- Sportta kimge eliktep, neni baǵyt-baǵdar tutasyń?
- Men úshin bastysy – keshegiden góri búgin jaqsy bolý. Men kóptegen sportshylardy qurmetteımin, degenmen óz jolymmen júrgim keledi.
- Alda qandaı mańyzdy jarystar bar?
- Qazirgi tańda Qazaqstanda ótetin Azııa – Tynyq muhıt birinshiligine daıyndalý ústindemin. Bul men úshin mańyzdy, onyń ústine týǵan elimizde ótedi.
Basty maqsat – óz nátıjemdi jaqsartyp, jeńistiń eń bıik tuǵyryna kóterilý.
- Qazirgi kezde oqyp júrsiń be, bos ýaqytyńda nemen shuǵyldanyp júrsiń?
- Oral joǵary gýmanıtarlyq-ekonomıkalyq kolledjin dene tárbıesi jáne sport mamandyǵy boıynsha támamdadym. Kúni búgin jattyǵýlar men óz sporttyq jolyma kóbirek nazar aýdarýdamyn.
Bos ýaqytymda babymdy ustap, denemdi shyńdaı túsý úshin fıtnes-zalǵa barǵandy unatamyn. Sondaı-aq fotografııamen, shyǵarmashylyqpen aınalysamyn, týystarymmen ýaqyt ótkizýge tyrysamyn.
- Jýyrda oblys basshysynyń qolynan qos bólmeli páter kiltin aldyń. Bul da qýanyshty ústegen shyǵar?
- Shynymdy aıtsam, bul óte áserli boldy. Óz eńbegińniń baǵalanǵanyn túsingen kezde bul odan saıyn kúsh beredi. Men úshin bul – tek baspana ǵana emes, sonshama kúsh-jiger, jattyǵýdyń, jaraqat pen jeńisterdiń qur ketpegeniniń dáleli.
- Sońǵy saýal, ómirlik kredoń qandaı?
- Meniń kredom – jaryqtyń qarańǵylyqta týatynyn umytpaý, eshqashan ishki tiregińdi joǵaltpaý. Aldaǵy ýaqytta da ómirlik maqsat-muratymnan tanbaı, ózime tilekshi el-jurtymdy jeńisterimmen qýanta bersem deımin.
Eske sala keteıik, budan buryn batysqazaqstandyq bapkerdiń shákirtterin olımp shyńynan kórgisi keletinin jazǵan bolatynbyz.
