Sýrdlımpıadada ulttyq qurama kapıtany qola júldeni jeńip aldy
NUR-SULTAN. QazAqparat – Brazılııada ótip jatqan sýrdlımpıada oıyndarynda taekvandodan jarystar aıaqtaldy. Ulttyq qurama kapıtany, 58 kelide synǵa túsken Aıan Ábdirash qola júldeni jeńip aldy, dep habarlaıdy QazAqparat QR Mádenıet jáne sport mınıstrligine silteme jasap.
Sondaı-aq, 68 kelide el namysyn qorǵaǵan Nurdáýlet Jaqyp pen +80 kelide Frýndın Vıktor da úshinshi orynǵa turaqtap, qola medal ıegerleri atandy.
Al, ıadro laqtyrýdan Olga Hıjnıakova Qazaqstan qorjynyna úshinshi kúmis júldeni saldy. Sportshymyz 12.32 m nátıjesimen ekinshi orynǵa turaqtady. Birinshi oryndy Ýkraına sportshysy jeńip alsa, úzdik úshtikti Kolýmbııa ókili qorytyndylady.
Sonymen qatar, jeńil atletıkadan Farhat Qystaýbaev kedergilermen júgirýden qola júldeni ıelense, Raýshan Beısebaı syryqpen sekirýden úzdik úshtik qatarynan kórindi. Al, Olga Hıjnıakova balǵa laqtyrýdan taǵy bir qola júldeni jeńip aldy.
Sonymen, Qazaqstan qorjynynda 3 kúmis, 15 qola júlde bar.
Brazılııanyń Kashıas-dý-sýl qalasynda jazǵy Sýrdalımpıadanyń saltanatty ashylý rásimi ótkenin habarlaǵan bolatynbyz. Baıraqty básekede álemniń 100 elinen 3500 sportshy baq synap jatyr.
