Qazaqstandyq kýrsant halyqaralyq áskerı-ǵylymı baıqaýda jeńiske jetti
ASTANA. KAZINFORM — Kóp satyly saraptamalyq baǵalaý qorytyndysy boıynsha qazaqstandyq Ádilet Serikbaıdyń zertteýi TMD-ǵa múshe elder joǵary áskerı oqý oryndarynyń tyńdaýshylary men kýrsanttarynyń VII Halyqaralyq áskerı-ǵylymı jumystar baıqaýynda úzdik dep tanyldy. Bul týraly Qorǵanys mınıstrliginiń baspasóz qyzmeti málim etti.
Bul eńbegi úshin Qıyr Shyǵys gvardııalyq joǵary jalpy áskerı komandalyq ýchılışesiniń kýrsanty Ádilet Serikbaı Reseı Federatsııasy Qorǵanys mınıstrliginiń gramotasymen marapattaldy.
Uly Jeńistiń 80 jyldyǵyna oraı ótkizilgen baıqaýǵa 700-den asa áskerı-ǵylymı jumys usynyldy. Qazaqstandyq kýrsanttyń «Qazaq halqynyń Uly Otan soǵysyndaǵy Jeńiske qosqan úlesi» taqyrybyndaǵy zertteýi qazaqstandyqtardyń maıdanda kórsetken erligi men tabandylyǵy, tyldaǵy janqııarlyǵy týraly tarıhı rólin kórsetti.
– El tarıhyn halyqaralyq deńgeıde tanystyrý men úshin abyroıly is. Ata-babamyzdyń erligin umytpaý – bizdiń mindetimiz, – dedi bolashaq ofıtser.
Ádilet Serikbaı 2003 jyly Pavlodar oblysy, Baıanaýyl aýdany, Sátbaev aýylynda dúnıege kelgen. Ol mektepte oqyp júrgende áskerı maman bolǵysy keldi. 2020 jyly Almatydaǵy Qurlyq áskerleriniń áskerı ınstıtýtyna túsip, keıin Qıyr Shyǵys gvardııalyq joǵary jalpy áskerı komandalyq ýchılışesinde «teńiz jaıaý áskerleri bólimshelerin basqarý» mamandyǵy boıynsha oqýyn jalǵastyrdy. Aldaǵy ýaqytta Ádilet Serikbaı QR Qarýly kúshteriniń Arnaıy operatsııalar kúshteri qatarynda qyzmetin jalǵastyrýdy josparlap otyr.
Qazaqstandyq kýrsanttyń halyqaralyq baıqaýdaǵy bul jeńisi bolashaq ofıtserlerdiń daıarlyq deńgeıi joǵary ekendiginiń aıqyn dáleli bolyp qana qoımaı, TMD-ǵa múshe elderdiń áskerı-ǵylymı yntymaqtastyq júıesinde elimizdiń bedelin nyǵaıtty.
Aıta keteıik, matros Baqdáýlet Kúzdibaev áskerı qyzmet pen sýret ónerin ushtastyryp júr.