Sýrdlımpıada oıyndary aıaqtaldy: Qazaqstan 25 medal enshiledi
ASTANA. KAZINFORM — Búgin Tokıo qalasynda XXV-shi jazǵy Sýrdlımpıada oıyndarynyń resmı jabylý saltanaty ótti. Baıraqty básekede Qazaqstan ulttyq quramasy 8 altyn, 4 kúmis jáne 13 qola medal jeńip, 81 eldiń ishinde medaldik esepte 9-shy orynǵa turaqtady. Bul týraly Sport jáne dene shynyqtyrý isteri agenttigi málim etti.
Sýrdlımpıada oıyndarynyń saltanatty jabylý rásimi Tokıo metropolıten gımnazııasynda Japonııa eliniń hanshaıymy Kako Aksıno, Tokıo qalasynyń meri ıÝrıko Koıke jáne halyqaralyq Sýrdlımpıada komıtetiniń prezıdenti Adam Kosanyń qatysýmen ótti.
Komandalardyń sherýinde elimizdiń kók baıraǵyn jeńil atletıkadan XXV jazǵy Sýrdlımpıada oıyndarynyń qola júldegeri Nursultan Kýldeev pen júzýden ulttyq qurama sportshysy Marııa Sotnıkova alyp shyqty.
Saltanatty rásim barysynda Halyqaralyq Sýrdlımpıada komıtetiniń prezıdenti Adam Kosa oıyndardyń aıaqtalǵanyn habarlap, sportshylarǵa alǵysyn bildirdi.
Aıta keteıik, XXV jazǵy Sýrdlımpıada oıyndary Japonııa astanasy Tokıo qalasynda 15–26 qarasha aralyǵynda ótti. Bul — tórt jylda bir uıymdastyrylatyn estý qabileti zaqymdanǵan sportshylar arasyndaǵy eń bedeldi halyqaralyq jarys. Dodaǵa 81 elden 3000-ǵa jýyq sportshy qatysyp, 21 sport túri boıynsha 209 dıstsıplınada baq synady. Qazaqstan ulttyq quramasy 78 sportshymen 8 sport túrinen óner kórsetti.
Bıylǵy Sýrdlımpıadada Qazaqstan quramasy úshin eń nátıjeli sport túri sýrdo dzıýdo boldy. Bul synda otandastarymyz 5 altyn, 2 kúmis jáne 4 qola medal jeńip alyp, barlyǵy 11 júldege qol jetkizdi.
Erkin kúresten 1 altyn, 1 kúmis jáne 3 qola medal oljalansa, grek-rım kúresinde ulttyq qurama qorjynyna 1 altyn, 1 kúmis jáne 1 qola júlde tústi.
Jeńil atletıkada Qazaqstan 1 altyn jáne 1 qola medal enshilep, Faına Meırmanova bıiktikke sekirý saıysynda 1,79 metr nátıjemen Sýrdlımpıada rekordyn jańartty. Taekvondoshylar kerýgı dıstsıplınasynda 3 qola júlde ıelense, ústel tennısinen erler quramasy komandalyq synda qola medalǵa qol jetkizdi.
— Elimizde sýrdlımpıadalyq sport túrleri qarqyndy damyp, sportshylarymyz halyqaralyq arenalarda jańa bıikterdi baǵyndyrýda. Máselen, 2022 jyly Brazılııada ótken aldyńǵy Sýrdlımpıada oıyndarynda ulttyq qurama 4 altyn, 7 kúmis jáne 18 qola medalmen medaldik esepte 13-orynǵa turaqtaǵan bolsa, bıyl 8 altyn, 4 kúmis jáne 13 qola medalmen 9-orynmen jarysty qorytyndylady. Bul — múmkindigi shekteýli tulǵalar sportyn damytýǵa baǵyttalǵan júıeli jumystyń jáne memleket tarapynan kórsetilip otyrǵan turaqty qoldaýdyń naqty nátıjesi. Aldaǵy ýaqytta da sportshylardyń áleýetin arttyrýǵa jáne joǵary jetistikterge jetýine jan-jaqty qoldaý kórsetýdi jalǵastyramyz, — dedi QR Týrızm jáne sport mınıstrligi Sport jáne dene shynyqtyrý isteri komıteti tóraǵasynyń orynbasary Nurlan Esembaev.
Eske sala keteıik, buǵan deıin Japonııanyń astanasy — Tokıoda XXV jazǵy Sýrdlımpıada oıyndarynyń resmı ashylý saltanaty 15 qarasha kúni ótkenin jazǵan bolatynbyz. Estý qabileti zaqymdanǵan sportshylar arasynda tórt jylda bir ótetin dúbirli doda bıyl erekshe tarıhı mánge ıe — Sýrdlımpıadalyq qozǵalystyń 100 jyldyǵymen tuspa-tus kelgen edi.