Sýrdlımpıada-2025: Qazaqstan sportshylary 13 medal jeńip aldy
ASTANA. KAZINFORM – Japonııa astanasy Tokıo qalasynda ótip jatqan XXV jazǵy Sýrdlımpıadanyń alǵashqy úsh kúninde Qazaqstan ulttyq quramasy 13 medal jeńip aldy. Onyń ishinde 6 altyn, 2 kúmis jáne 5 qola júlde bar. Bul týraly Týrızm jáne sport mınıstrligi habarlady.
2022 jylǵy XXIV jazǵy Sýrdlımpıadada Qazaqstan quramasy rekordtyq 29 medal (4 altyn) enshilegen bolatyn. Tokıodaǵy jarysta sýrdo dzıýdodan Hamza Ǵulama (-66 kg), Shadııar Qýandyq (-73 kg), Erkebulan Qanafın (-81 kg) jáne Ámına Faızýlına (-70 kg) altyn medal jeńip alsa, Aıdarbek Toqtarbek (-100 kg) kúmis júldeger atandy. Al Sabyrjan Hapızov (+100 kg), Altynbek Kákitaev (-60 kg), Aıym Jetpisbaeva (-48 kg) jáne Anna Karmorova (-78 kg) qola medal ıelendi.
Búgin Qazaqstannyń erler komandasy dzıýdodan komandalyq jarysta jeńimpaz atansa, áıelder quramasy kúmis júldege qol jetkizdi.
Sýrdo jeńil atletıka saıysynda Faına Meıirmanova bıiktikke sekirýden 1.79 metr nátıjemen Sýrdlımpıada rekordyn jańartyp, chempıon atandy. Sondaı-aq onsaıys boıynsha Nursultan Kúldeev 5 725 upaı jınap, qola medal enshiledi.
Eske sala keteıik, bıylǵy Sýrdlımpıada 15-26 qarasha kúnderi Japonııanyń Tokıo qalasynda ótip jatyr. Bul – tórt jylda bir ret uıymdastyrylatyn estý qabileti buzylǵan sportshylar arasyndaǵy eń bedeldi halyqaralyq doda.
Baıraqty básekede 81 elden kelgen 3 000-ǵa jýyq sportshy 21 sport túri boıynsha 209 dıstsıplınada júldelerdi sarapqa salyp jatyr. Qazaqstan quramasynan 78 sportshy 8 sport túri boıynsha baq synap jatyr. Buǵan deıin Almatydaǵy Olımpıadaǵa daıarlyq ortalyǵynda Qazaqstan ulttyq quramasyn Sýrdlımpıadaǵa shyǵaryp salý rásimi ótken bolatyn. Іs-sharaǵa Týrızm jáne sport mınıstri Erbol Myrzabosynov pen Ulttyq Sýrdlımpıada komıtetiniń prezıdenti Serik Sápıev qatysty. Saltanatty rásim barysynda mınıstr ulttyq quramaǵa Qazaqstannyń memlekettik Týyn tapsyryp, sportshylarǵa sáttilik pen jarqyn jeńister tiledi. Aıta keteıik, búginde elimizde sportshylardyń kásibı daıyndalýyna jan-jaqty jaǵdaı jasalyp jatyr. 2029 jylǵa deıin 113 jańa sport nysanyn salý jáne 26 nysandy qaıta jańartý josparlanǵan.
Almaty oblysyndaǵy zamanaýı respýblıkalyq Olımpıadaǵa daıarlyq ortalyǵynda bir mezette 2 300 sportshy olımpıadalyq jáne sýrdlımpıadalyq sport túrleri boıynsha jattyǵa alady. Sondaı-aq «100 jyldam salynatyn modýldi sport nysany» jobasy qarqyndy júzege asyp jatyr. Keıingi bir jylda óńirlerde 25 jańa sport kesheni paıdalanýǵa berildi.