Suranysqa ıe TOP-10 jeńil avtokólik anyqtaldy
ASTANA. QazAqparat - Aqpan aıynda elimizdiń avtonaryǵyndaǵy satylym qańtarmen salystyrǵanda 1,4 paıyzǵa tómendegen, dep habarlaıdy QazAqparat Qazaqstan avtobıznes qaýymdastyǵyna silteme jasap.
Dıllerlerde avtokólikterdiń bolmaýy, ótken jyldan qalǵan avtokólikterdi qaıta satý - qystyń sońǵy aıyndaǵy satylymǵa edáýir áser etken. Dese de, bıylǵy aqpan aıynyń kórsetkishi ótken jyldyń aqpan aıymen salystyrǵanda 3,3 paıyzǵa artyq bolyp otyr.
«Resmı dıllerler aqpan aıynda 4 256 jeńil jáne jeńil kommertsııalyq avtokólik, 124 aýyr júk kóligi men arnaıy tehnıka, avtobýs satqan. 2019 jyldyń alǵashqy eki aıynyń qorytyndysy boıynsha 8 846 avtokólik (ótken jyldyń alǵashqy eki aıynda 7 526) saýdalanǵan», - dep habarlaıdy qaýymdastyqtan.
Satylǵan brendti jeńil avtokólikterdiń ondyǵyn Lada (1 249, +23%), Toyota (817, -15,5%), Hyundai (696, -12,6%), Kia (284, -15,7%), Renault (173, +15,3%), Volkswagen (144, -25.8%), Nissan (143, +2.9%), Lexus (123, +2,5%), Chevrolet (58, -19,4%) jáne Skoda (55, +17%) qurady.
Jeńil avtokólikterdi esepke alǵanda, Almatydaǵy taksoparkterdiń Lada Granta avtokóligin jappaı satyp alýynyń nátıjesinde atalǵan marka eń kóp satylatyn (488) kóliktiń kóshin bastaǵan. Ekinshi orynda Lada 4x4 (347) bolsa, sońǵy úsh jyldyń bestselleri Toyota Camry (339) úshinshi oryndy túıindep otyr. Odan keıingi tizimdi Hyundai Tucson (335) Lada Vesta (234), Toyota LC Prado (208), Hyundai Accent (199) jáne Lada Largus (140), Toyota Hilux (105) men Hyundai Elantra (105) jalǵaıdy.
