Suranysqa ıe mamandyqtar tizimi jyl saıyn jańartylady - Úkimet otyrysy

NUR-SULTAN. QazAqparat – Aldaǵy 5 jylda jumysshylardyń daǵdylary 40 paıyzǵa ózgeredi. Bul týraly Úkimet otyrysynda QR Eńbek jáne halyqty áleýmettik qorǵaý mınıstri Serik Shápkenov aıtty, dep habarlaıdy QazAqparat tilshisi.

«Qazirgi eńbek naryǵyndaǵy tendentsııalardy eskersek, sarapshylar jaqyn 5 jyldyqta jumysshylardyń daǵdylary, talaptardyń 40 paıyzǵa jýyǵy ózgeredi dep boljaýda. Eńbek resýrstarynyń kásiptik daǵdylaryn damytý jáne kásiptik baǵdarlaý baǵytynda birqatar is-sharany qolǵa alamyz.

Birinshiden - bıznespen birlesip, kásiporyndar janyndaǵy oqý ortalyqtary negizinde jappaı qaıta daıarlaý, biliktilikti arttyrý «fabrıkalaryn» qurý. Oqýdy uıymdastyrýda jastarǵa, suranysy joǵary mamandyqtarǵa erekshe mán beriletin bolady.

Ekinshiden, suranysqa ıe daǵdylardy taný júıesi engiziledi. Memleket basshysy Qasym-Jomart Kemelulynyń tapsyrmasy boıynsha mınıstrlik «Ulttyq biliktilik júıesi týraly» zań jobasyn ázirleýde. Onyń aıasynda táýelsiz biliktilikti taný ortalyqtaryn qurýǵa tıimdi jaǵdaı jasaý, jyl saıyn sertıfıkatsııalaýdan ótý úshin jumys izdeýshilerge keminde 1 000 vaýcher usyný qarastyrylady», - dedi mınıstr.

Onyń atap ótýinshe, úshinshiden, Skills.enbek.kz platformasynda onlaın oqý arqyly jańa bilim men daǵdylardy ıgerýge jaǵdaı jasalady.

«Tórtinshiden, oqýshylar men jastar arasynda kásiptik baǵdarlaýdy uıymdastyrý úshin mansaptyq ilgerileý boıynsha keminde 100 nusqaýlyq ázirlenip, joǵary synyp oqýshylary qamtylady. Sonymen qatar, suranysqa ıe mamandyqtar men bolashaǵy zor daǵdylardyń tizimi jyl saıyn jańalanatyn bolady. Atalǵan sharalar jumys berýshilerdiń suranysyna qaraı kadrlar daıyndaýǵa, jastardy eńbek naryǵynda suranysqa ıe mamandaqtar men daǵdylar týraly aqparattandyrýǵa, olarǵa mamandyq tańdaýda qoldaý kórsetýge múmkindik beredi», - dedi Serik Shápkenov.