Suranysqa ıe 28 jańa mamandyq tegin oqytylady - vıtse-mınıstr

ASTANA. QazAqparat - Eńbek naryǵynda suranysqa ıe 28 jańa mamandyq memlekettik tapsyrys arqyly oqytylady. Bul týraly búgin Úkimet otyrysynda «Nátıjeli jumyspen qamtý jáne jappaı kásipkerlikti damytý baǵdarlamasy» týraly baıandaǵan Bilim jáne ǵylym vıtse-mınıstri Bıbigúl Asylova aıtty, dep habarlaıdy QazAqparat tilshisi. 

«Kadrlardy oqytýdaǵy memlekettik tapsyrystyń qurylymy óńirlerdiń suranysyna sáıkes ózgertildi. Mysaly qyzmet kórsetý, aýyl sharýashylyǵy jáne kólik salalary boıynsha kadrlardy oqytý 10 paıyzdan asa ósti. Jumys berýshilerdiń usynysymen eńbek naryǵynda suranysqa ıe 28 jańa mamandyq memlekettik tapsyrysqa engizildi», - dedi vıtse-mınıstr.

Onyń atap ótýinshe, oqý protsesine 246 modýldik oqý baǵdarlamasyn engizý arqyly kadrlardy daıyndaý mazmuny jáne memlekettik jalpy bilim berý standarty ózgertildi. Bul bızneske dýaldy oqytýda 80 paıyzǵa deıin, dástúrli bilim berýde 50 paıyzǵa deıin ózgerister engizýge  múmkindik beredi.

«Baǵdarlamanyń barlyq qatysýshylaryna shákirtaqy, ystyq tamaq jáne jolaqy qarastyrylǵan. Baǵdarlamany qarjylandyrý úshin respýblıkalyq bıýdjetten qosymsha 17,2 mlrd teńge bólinip, jergilikti bıýdjetterge jiberildi»,  - dedi Bıbigúl Asylova.