Suralǵan respondentterdiń árbir ekinshisi aýdandyq jáne aýdanaralyq sottarǵa senimsizdikpen qaraıdy
Bul týraly búgin Almatyda «Transparensı Qazaqstan» qoǵamdyq qory «Sot pen onyń barlyq deńgeıleriniń qyzmetiniń jarııalylyq deńgeıin baǵalaý jáne halyqtyń kózqarasyn anyqtaý» taqyrybymen ótken zertteý nátıjelerin jarııalaý kezinde aıtyldy.
«Qala turǵyndary arasyndaǵy saýalnama qorytyndylaryna qaraǵanda sotpen tikeleı qarym-qatynasta bolmaǵan azamattar arasynda sottyń is-áreketi jóninde bir maǵynaly emes pikir qalyptasqan. Respondentterdiń 55 paıyzynyń pikirinshe, Qazaqstandaǵy sot júıesiniń jumysyna úsh degen baǵa qoıýǵa bolady. Al 24 paıyzy olardyń jumysyn jaqsy jáne óte jaqsy dep baǵalaıdy.
«Qazaqstandyq sottar qanshalyqty ádiletti jáne táýelsiz?» degen suraqqa baılanysty da qarapaıym halyq arasynda qarama-qarsy pikir taraǵan. Respondentterdiń 45 paıyzy bul kórsetkish boıynsha oń pikir bildirse, al 53 paıyzy sottardyń obektıvtiligine kúmánmen qaraıdy», - deıdi zertteý sarapshysy Gúlnara Ileýova.
Onyń aıtýynsha, jaı halyqtyń sot júıesine 10 paıyzy tolyq senedi, 44 paıyzy senýge jaqyn. Óziniń senimsizdigin respondentter eń aldymen, olardyń jumysy týraly aqparattyń jetkiliksizdigimen jáne sottyń barlyǵy tek bıligi men aqshasy barlardy ǵana qorǵaıdy degen stereotıptik ustanymmen túsindiredi. Sottardyń ishinde halyqtyń senimine Joǵarǵy Sot ıe - 74 paıyz. Oblystyq jáne qalalyq sottarǵa degen adamdardyń senimi áldeqaıda az - 48 paıyz. Aýdandyq jáne aýdanaralyq sottarǵa qala turǵyndary arasynda árbir ekinshi respondent senbeıdi.
Halyqtyń pikirinshe, Qazaqstandaǵy sot júıesiniń negizgi máseleleri - sarsańǵa salýshylyq - 40%, sottardyń bılikke táýeldiligi - 35% jáne jemqorlyq - 32%. Sottardyń arasynda jemqorlyqtyń kórsetkishi aýdandyq jáne aýdanaralyq sottarda joǵary. Jemqorlyqtyń sebepteri týraly aıtqanda, respondentter eń aldymen sot jumyskerleriniń dúnıeqorlyǵyn (37%), adamdardyń formaldy emes túrde isti jabýǵa umtylýyn (27%), jergilikti dástúrdi (25%) alǵa tartady. Sonymen qatar sottardaǵy jemqorlyq týraly pikirde adamdar óziniń tájirıbesine emes, BAQ materıaldaryna súıene otyryp aıtady (34%). Aqparattyń jetispeıtindigi jóninde suralǵan turǵyndardyń 48 paıyzy aıtty. Sot qyzmeti týraly aqparat alýdyń negizgi kózderi - telebaǵdarlamalar(67%), gazetter (54%) jáne tanystar, týystar, áriptester (36%).
